Ал елімізде «Таза Қазақстан» жобасы аясында тазалық шарасы үздіксіз жүргізіліп келеді. Батыс Қазақстан облысында еріктілер қоғамда экологиялық мәдениетті қалыптастыруға үлес қосып жүр. Өңірдегі студенттер бас біріктіріп, «Орал жастары» еріктілер қозғалысына топтасқан. Әсіресе экобатл жобасы жастар арасында кеңінен танымал. Олар жарыса жүріп, айналаны тұрмыстық қалдықтан арылтады. Биыл 7 рет өткен экобатл жобасына 20 колледж бен 4 жоғары оқу орнының студенттері қатысты.
Расул Болатұлы, колледж студенті:
Экобатл негізінен бізге жаңа достар табуға, замандастарымызбен жақын араласуға және қаламыздың тазалығы үшін керек деп ойлаймын. Бұл жерде тек қоқыс жинап қоймай, қаланың әдемілігіне үлес қосып жатырмыз. Ауламыз қаншалықты таза болса, ауамыз да соншалықты таза болады.
Мектеп оқушылары да қоғамдық бірлестік құрып, ерікті түрде сенбіліктер ұйымдастырып жүр. Назарбаев зияткерлік мектебінің шәкірттері үш жыл бұрын «Қадам» еріктілер қозғалысын ашқан. Олар бос уақытында экологиялық жорықтар жасап, өзен жағалауын, сай-саланы қоқыстан арылтады.
Наргиза Ерболатова, «Qadam» еріктілер қозғалысының жетекшісі:
2022 жылы, яғни біздің ұйым құрылған кезде жаһандық жылыну туралы көп айтылды. Басқа елдің зерттеушілері жаһандық жылынудың жақындап келе жатқанын айтты. Соны естіп біз құр отыра алмадық. Яғни экожорықтарға шығу керек екенін түсіндік. Еріктілер тобының басты мақсаты – барлығына көмектесу.
Ардақ Мұратқызы
