БАҚ қызметкерлері кәсіби мереке күні баспаналы болды, деп хабарлайды 24kz.

Бүгін Мемлекет басшысының тапсырмасымен медиа саласының 66 қызметкеріне пәтер сертификаты тапсырылды. Игі дәстүр осымен үшінші мәрте ұйымдастырылды. Үш жыл бұрын 65 азамат үйлі болса, былтыр 67 отбасыға баспана кілті берілді.

Қаламын қару еткен БАҚ қызметкерлері бүгін үйлі болды. Айтулы мереке күні 10 көпбалалы жанұя мен 9 жалғызбасты ана, сондай-ақ мүмкіндігі шектеулі бала асырап отырған және ерлі-зайыптылардың бірі еңбекке жарамсыз деп танылған 12 отбасыға баспана сертификаты табыс етілді.

Руслан Желдібай, ҚР Президентінің кеңесшісі – Баспасөз хатшысы:

- Бұл – Мемлекет басшысының отандық медиаға, журналистерге деген үлкен қолдауы. Өздеріңіз білесіздер, әр азаматтың өмірінде баспана үлкен рөл ойнайды. Сондықтан біз бұл игі дәстүрді Мемлекет басшысының тапсырмасына сәйкес келесі жылы да жалғастыратын боламыз.

Ақжолтай жаңалықтың жаршысы болған жандардың қатарында арнамыздың тілшілері де бар.

Әділ Балтабаев, «President» арнайы жобасының авторы:

- Президенттің Минск қаласына жасаған жұмыс сапарынан кеше түнде ғана оралдық. Осы аралықта жобамыз «Тұмар» сыйлығының жүлдегері атанып, бүгін баспаналы болу бақыты бұйырған екен. Мемлекет басшысының рахмет айтқым келеді. Бұл жерде көпбалалы отбасылар, ерекше қажеттілігі бар балаларды асырап отырған жанұялар ғана емес, мен сияқты жас журналистерге де үйлі болды. Бұл, әрине, жұмыс істеуге құштарлығымызды арттырып, шабытымызды шыңдайды.

Назерке Тоғжан, жаңалықтар бөлімінің тілшісі:

- Қиындығынан гөрі қызығы басым салада сан жыл еңбек етіп келе жатқан аға буын өкілдерінің ізін жалғап, кейінгі толқын қыз-жігіттердің шоғыры қалыптасып келеді. Сол шоғырдың бір өкілі бүгін мен. Міне, Мемлекет басшысының атынан 1 бөлмелі пәтерге ие болып отырмын. Өте қуаныштымын. Бұл баспана жай ғана 4 қабырға емес. Ел ертеңі жаңа сенім, үлкен өмірдің бастауы деп білемін.

Пәтер кілті тілшілерден бөлек, БАҚ саласында ұзақ жылдар бойы еңбек етіп келе жатқан режиссёр, оператор, фотограф, монтажер, корректор секілді техникалық мамандарға да берілді. Президент бастамасымен жүзеге асқан игі бастама келер жылы да жалғасын таппақ.

Авторлары: Назым Қайрат, Камила Тастанбек, Артур Горшняков