Испанияның басты билік партиясының сыбайлас жемқорлық әрекеті әшкере болды, деп хабарлайды 24kz.
Елдің көлік министрі және оның бұрынғы кеңесшісі, сонымен бірге премьер-министр Педро Санчестің ағасы мен әйелі күдікті ретінде сұралып жатыр. Алдын ала тергеу ақпаратына сәйкес көлік министрі мен кеңесшісі ковид пандемиясы кезінде медициналық бетперделерді сатып алуда қазына қаржысын жымқырған. Ал, премьер-министрдің туған ағасы әкімшілік қызметке ашық конкурссыз тағайындалған. Педро Санчестің әйелі Complutense университетіндегі магистратура бағдарламаларын басқару кезінде жеке ұйымдарға тендер арқылы артықшылық берген деген күдікке ілінді. Парламенттегі опозициялық күш өкілдері Премьер Санчестің отставкаға кетуін талап етуде. Ал, өз кезегінде билік партиясы: «Әділ тергеуге көмектесіп, шын қылмыскерді анықтауға атсалысамыз», - деп мәлімдеген. Тергеуге алынған жоғары лауазымды тұлғалар – билік тізгініндегі «Испания социалистік жұмысшы партиясының» белді мүшелері.
