АҚШ президенті Дональд Трамп Иранға 2 апта уақыт берді. Осы аралықта Тегеран ядролық бағдарлама бойынша келісімге келуге тиіс. Өйтпеген жағдайда әскери күш қолданатынын ашық ескертті .
Ақ үйдің баспасөз хатшысы Кэролайн Ливиттің айтуынша, президент Трамп Иранмен жақын арада келіссөз жүргізуге бейіл. Сондай-ақ ол Тегеранның ядролық қаруға қол жеткізу қаупі әлі де бар екенін мәлімдеді. Конституцияға сай АҚШ-та тек Конгресс соғыс жариялауға құқылы. Яғни Президент өз бетінше шешім қабылдай алмайды. Демек дәл қазір Ақ үй басшысының Иранға қарсы әскери операция бастауға мандаты, яғни билігі жоқ.
Кэролайн Ливитт, Ақ үйдің баспасөз хатшысы:
- Иранның ядролық қару жасауға қажетті барлық мүмкіндігі бар. Оларға тек Жоғарғы көшбасшының шешімі ғана керек. Бұл қаруды жасап шығуға бірнеше апта ғана жетеді. Ал бұл Израильге ғана емес, сондай-ақ Америка Құрама Штаттарына және бүкіл әлемге үлкен қауіп төндіреді.
