Қарағанды облысында Балқаш көлі жағалауындағы Тораңғылық, Шұбартүбек туристік елді мекендеріне су тарту жұмысы басталды, деп хабарлайды 24kz.
Бұл демалыс орындарының қызмет сапасын жақсартуға оң серпін береді. Өлке туризмі жыл өткен сайын дамып келеді. Сала жетістіктері Балқаш Tour fest-2025 туристік фестивалі аясында пысықталды. Көл жағалуында өтіп жатқан кең ауқымды шараға туроператорлар, еріктілер, кәсіпкерлер, қала тұрғындары мен туристер көптеп келген.
Руслан Нұрланұлы баяндасын.
- Фестиваль осымен үшінші рет өткізіліп отыр. Биылғы мазмұны экологиялық мәдениетті насихаттауға, еріктілер қозғалысын дамытуға бағытталған. Соған сәйкес жастар арнайы өткізілген тренингте тәжірибе алмасып, экологиялық мәселелердің инновациялық шешімдерін талқылады.
Айсұлу Ерниязова, Қарағанды облысы Жастар саясаты мәселелері жөніндегі басқарма басшысы:
- Social Ton форматында тренинг ұйымдастырдық волонтёрларға арналған. Және де «Таза қазақстан» акциясы аясында пластикке екінші өмір беретін үлкен акция ұйымдастырдық.
Екі күн бойы өтетін шара барысында қала кәсіпкерлері өз өнімдерін сата алады. 2023 жылы алғашқы фестивальға 25 кәсіпкер қатысса, биыл олардың саны екі есеге көп. Сондай-ақ жиналған жұрт қолөнершілер көрмесін тамашалап, түрлі спорттық шараларға қатысты.
Балқашта туризм соңғы жылдары қарқынды дамып келеді. Былтыр демалушылар саны 140 000 болса, осы маусымда 200 000-ға жетуі мүмкін. Себебі суға шомылу жылдағыдан ерте басталды. Жол қатынасы да жақсарды. Жақын күндері арнайы бөлінген субсидия негізінде Балқаш әуежайына Алматы мен Астанадан рейстер ұша бастайды. Бүгінде мұндағы демалыс орындары мен қонақ үйлер күн сайын 25 мың адамды қабылдай алады. Оларға инженерлік желілер тартылып, инфрақұрылымын жақсартуға күш салынуда.
Сапар Сатаев, Балқаш қаласының әкімі:
- Бертіс жағалауында, қаланың ішіндегі кәсіпкерлерде су, кәріз жүйелері барлығы бар. Ал Шұбартүбек, Тораңғылыққа су тарту жұмыстарын бастадық. Қазіргі таңда бірінші кезеңімен 700 миллион теңге бөлініп тұр. Жобаның жалпы құны – 3,3 миллиард теңге.
Бұрын халқының табыс көзі өндіріске тәуелді болған Балқаш қаласы үшін туризм – дамудың тың бағыты. Өлкенің танымалдылығын арттыру жолында туристік фестиваль зор маңызға ие.
Авторлары: Руслан Нұрланұлы, Сайлау Игіліков
