Семейде «Туған жерге туыңды тік» атты инвестициялық форумы өтті. Жиынға Парламент депутаттары, шетелдік және отандық инвесторлар қатысты. 500-ге жуық кәсіпкер шақырылған. Өткен жылы өңірде нақты сектордағы негізгі капиталға салынған инвестиция көлемі 575,3 млрд теңге. Оның негізгі үлесі жеке инвестиция. Көлемі 436,5 млрд теңгеге жеткен. Ал тікелей шетелден тартылған қаржы 775,3 млн АҚШ доллары. Инвестфорумның басты мақсаты — облыстағы түрлі саланы дамытуға серпін беру.
Берік Уәли, облыс әкімі:
«Туған жерге туыңды тік» деген, бұл жалаң ұран, бос сөз емес. Бұл шын мәнісінде отансүйгіштігін дәлелдейтін, әр азаматтың туған жер алдындағы борышы деп білеміз. Біздің шақыртуымызды қабыл алып, әр өңірден, шетелден, жан-жақта жүрген жерлестеріміз келді. Біздің инвесторлардың бас қосқаны өте қуантарлық жағдай.
Бүгінде облыста 8 мыңнан астам тұрақты жұмыс орнын құруға бағытталған, жалпы құны 2,7 трлн теңге болатын жобалар іске асуда. Форум қорытындысы бойынша, өзара ынтымақтастық туралы 15 меморандумға қол қойылды. Абай облысындағы түрлі саланы дамытуға арналған жобалардың кейбірі жақын арада іске аса бастайды.
Сырымбек Тау, кәсіпкер:
Өзіміздің «Пана» қонақ үй желісін ашуды жоспарлап отырмыз. 500 орындық конференция залы болады. 5 заманауи, стандартқа сәйкес ресторандар ашылады. Екінші жобамыз — «SEMEY MALL» аталып кеткен құрылыс. Көп жылдардан бері тұр. Екі-үш күннен кейін құрылыс жобасын бастаймыз.
Ержан Жақып
