Семей қаласының автопаркі 44 су жаңа автобуспен толықты. Олардың басым бөлігі – кондиционерлермен жабдықталған жоғары класты көліктер. Әлеуметтік маңызы зор бұл іс мемлекеттің қолдауымен жүзеге асты. Абай облысының әкімі Берік Уәли жаңа техника жоғары сапасымен ерекшеленетінін атап өтті. Айта кету керек, бұл автобустарды жергілікті компания шығарады.
Аймақ басшысы қала автопарктерін жаңа техникамен толықтыруды бір ай бұрын уәде еткен еді. Осы уақытта жолаушы тасымалдаушы кәсіпорындар «СемАЗ» көлік құрастыру зауытымен келісімге келді.
Берік Уәли, Абай облысының әкімі:
- Қала тұрғындары үшін өте айтулы күн. Өйткені Семей қаласының автобус паркін жаңартып жатырмыз. Осындай ыстық күні бірінші рет қаламызда кондиционері бар автобустар жүреді. Біздің мақсатымыз – қала қонақтарының, тұрғындарының жүріп-тұруына жайлы, жақсы жағдай туғызу.
Жайық Айтқалиұлы, «СемАЗ» ЖШС кепілдік және сервистік бөлімінің басшысы:
- «СемАЗ» автобустарды 2018 бастап шығарып жатыр. Автобустар 18 орындық, қалаға өте қолайлы автобустар. Кішкентай автобустың бағасы 22 млн 500 мыңды құрайды, оған жаңағы негізгі «комплектациясы», басқа да қондырғылар орнатуға болады.
Қоғамдық көліктер ұлы Абайдың туғанына 180 жыл толуына орай ақын портретімен безендірілген.
Жалпы соңғы 6 жылда Семейде жаңа автобустар сатып алынбаған. Жыл соңына дейін жолаушы тасымалдаушы компаниялар техника паркін тағы да жаңартуды жоспарлап отыр. Яғни қазір таныстырылған 44 автобусты қоса есептегенде барлығы 70 қоғамдық көлік сатып алу көзделген.
Авторлары: Талғат Серікқалиұлы, Ботакөз Дандыбаева, Берік Жобалайұлы
