Австралияда өндірістік жарақат алу санын азайту үшін «ақылды» гаджеттер қолданылады .
Олар қызметкерлердің денсаулық жағдайы мен көңіл-күйін қадағалап отырады. Қытай кәсіпорындарында оқыс оқиғалардың алдын алуға роботтар көмектесіп жүр. Ал Үндістанда еңбекті қорғау туралы жаңа кодекс қабылданғанымен, өндірістегі қауіпсіздік мәселесі ақсаңдап тұр.
Үндістандағы өндіріс орындарында жазатайым оқиғалар жиі тіркеледі
Өндірісік орындарда жарақат алу оқиғалары ең көп тіркелетін елдің бірі – Үндістан. Мемлекетте жыл сайын 300 адам көз жұмады. Қайғылы жағдайлардың көбі ауыл шаруашылығы мен құрылыс саласында болады. Елде еңбекті қорғау саласына инвестиция аз құйылады. Біраз жабдықтың тозығы жеткен. Бұған биліктің шағын кәсіпорындарды қолдау үшін кейбір компанияларды еңбекті қорғау және қауіпсіздік техникасы бойынша есеп беруден босатудың да әсері бар. Лицензия беру және тексеру талаптары жеңілдетілген. Сондықтан жағдайды өзгерту үшін 5 жыл бұрын елде еңбекті қорғау туралы жаңа кодекс қабылданған. Бірақ әзірге ол тиімділігін көрсетпеді.
Австралияда жұмысшылардың қауіпсіздігі арнайы құрылғы арқылы бақыланады
Австралияда қауіпсіздікті арттыру үшін өндірісте қызметкерлер басына «ақылды таңғыш» тағып жүреді. Ол қорғаныс бас киімдеріне бекітіледі. Құрылғы адамның жүрек қағысы, тамырының соғуы, қан қысымы секілді маңызды көрсеткіштерді тіркеп отырады. Тіпті жұмысқа ден қою деңгейін де бақылай алады. Қызметкердің шаршағаны не көрсеткіштерінің нормадан ауытқуы байқалғанда оның телефонына ескерту хабарламасы келеді. Бұл жұмыстағы қателік санын 2 есе азайтуға мүмкіндік береді. «Ақылды таңғышты» әдетте австралиялық шахтерлер, теңізшілер мен ұшқыштар пайдаланады.
Қытай кәсіпорындарында 2 млн робот қолданылады
Қытайда өндірістік жарақаттану санын азайту үшін кәсіпорындарда адамдардың орнына роботтар қолданылады. Мұнда өнеркәсіптік салада екі миллиондай робот жұмыс істейді. Олар адамды жалықтыратын не физикалық жағынан қиын жұмыстарды жасайды. Мысалы, материалдарды тасымалдайды, құрамдас бөлшектерді жинайды, улы заттарды өңдейді. Өндірістік жарақат санын азайту үшін шығысымыздағы көршімізде сондай-ақ виртуалды шынайылық пен жаттықтыру құралдары кеңінен қолданылады. Олар қызметкерлерді қауіпті жағдайда әрекет етуге үйретеді.
Авторлары: Жұлдыз Атагельдиева, Райхан Серикова
