«Бәйтерек» футбол клубының директоры ретінде талай баланың спортпен достасуына себепкер болған азаматтың есімі осы тартысты бәсеке арқылы кейінгі ұрпақ жадында жаңғыра түсті, деп хабарлайды Egemen.kz.
Биыл бесінші мәрте ұйымдастырылып отырған бұл турнирдің ашылу сәтінде Батыржан Хасеновтің туыстары, достары және әріптестері сөз сөйлеп, оның адами болмысы мен қоғамға сіңірген еңбегі туралы тебірене еске алды.
«Батыржан – алты баланың кенжесі болғанымен, бәріміздің үлкеніміз сияқты еді. Үлкенге де, кішіге де үнемі қамқор болып жүретін. Оның есімі тек отбасында ғана емес, достары мен шәкірттерінің жүрегінде мәңгі сақталады. Биыл бесінші рет өткізіліп отырған осы турнир – соның айқын дәлелі. Бұл сайысты ұйымдастырушылар – Батыржанның достары. Біз – отбасы мүшелері де шет қалмай, жүлде қорына үлесімізді қосып келеміз. Алғашында осы жасыл алаңдағы жарыс тек ересектер арасында өтетін. Мінеки, биыл тұңғыш рет балалар арасында ұйымдастырылып отыр. Бәлкім, бұл да бекер емес шығар. Өйткені Батыржан өте балажан болатын. Кішкентай футболшыларды жанын салып жаттықтыратын, тек спортқа қана емес, өмірге баулып, ағалық ақыл кеңесін айтып жүретін», деді Батыржанның әпкесі Гүлнар Сейдахметқызы.
Жарысқа елорданың түрлі спорт мектептері мен футбол орталықтарынан 2017 жылы және одан кейін дүниеге келген балалардан құралған 8 команда қатысты. Олар көктемнен бері дайындалып, бұл турнирді асыға күткен. Балалардың көзіндегі жалын, алаңға шыққандағы сенімді жүріс – бәрі бұл жарыстың олар үшін қаншалықты маңызды екенін аңғартты.
Турнирдің басты ерекшелігі – мұнда тек жарысу ғана емес, өмірден өткен азаматты ұрпақ жадында сақтау, жас ойыншылардың жүрегіне үлгі болар тұлғаны таныту көзделді.
Жарыс соңында Жеңімпаздарға дипломдар, кубоктар мен бағалы сыйлықтар табысталды.
