Жергілікті тұрғын Бақлан Рахимбердинов күмәнді жағдайда қаза тапты. Марқұмды белгісіз біреулер алдап үйінен шығарып, қала сыртына алып кеткен. Сол жерде оны аяусыз соққыға жыққан, деп хабарлайды Skifnews.kz ақпарат порталы.
Бейнежазбалардың бірінде бірнеше жігіттің Бақланды көлікке күштеп отырғызып жатқаны анық көрінеді.
Ал екінші видеода — ес-түссіз, қансыраған жігітті дәрігерлерге жеткізген сәт. Сол кезде қабылдау бөлімінің алдында тұрған полиция қызметкерінің әрекеті қоғамды ашуландырды. Қатты соққы алған, қанды күйде жатқан адамды көріп тұрса да, тәртіп сақшысы ешқандай шара қолданбаған.
Бақлан ауруханаға тірі жеткен бе, әлде жолда жан тапсырды ма — бұл жағы әзірге белгісіз. Бірақ ана жүрегі баласының өліміне кінәлілер жазасыз қалуы мүмкін бе деп алаңдайды.
Марқұмның анасы баласының өліміне кінәлілердің әділ жаза алғанын қалайды. Оның сөзінше, «Шерзат ісіндегі» секілді бұл жолы да қатыгездік көрсеткендер тек «бұзақылық» бабымен құтылып кетуі мүмкін. Анасының бейнежолдауы қазір әлеуметтік желіде кең тарап жатыр.
