Президент тапсырмасына сәйкес 2025 жылдың соңына дейін барлық ауылдар орталықтандырылған ауызсу жүйесіне қосылуы тиіс. Осы мақсатта Қызылорда облысындағы төрт ауылға су құбыры тартылып жатыр, деп хабарлайды 24kz.
Солардың бірі – Шәкен елді мекені. Жергілікті тұрғындар тіршілік нәрін әлі күнге дейін құдықтан тасып ішеді.
Шәкен ауылында ауызсу мәселесі әлі шешімін таппаған. Елді мекеннің тұрғындары тіршілік нәрін ауыл шетіндегі құдықтан тасып ішуге мәжбүр. Көбі суды көлікпен, арбамен, тіпті есекке артылған бөшкелермен жеткізеді.
Нұрлан Жақыпбеков, тілші:
- Бұл құдық 50 жыл бұрын қазылған, содан бері ауыл тұрғындары осы жерден күнделікті тіршілік нәрін тұрмыста тұтынып келеді. Айтуларынша, бұл су мөлдір әрі тұщы екен. Дәмін көрейік. Рас екен.
Шәкен ауылдық округінде 119 үй түтін түтетіп отыр. Тұрғын саны 700-ден асады. Ауыл әкімінің айтуынша, құдық суының сапасы үнемі бақылауда.
Берекет Сәрсенбаев, Шәкен ауылдық округінің әкімі:
- Арнайы біз аудандық СЭС мекемесінен проба құйып апарып береміз, зертханасына. Сол жерде тексеріп, қорытындысын шығарып отыр. Пайдалануға жарамды.
Қазір ауылға орталықтандырылған ауызсу жүйесі тартылып жатыр. Құрылыс жұмыстары наурыз айында басталған. Жоба бойынша 8,7 шақырым құбыр салынуы тиіс. Соның 7 шақырымы толық аяқталған.
Сәтбай Айдарбек, Қазалы аудандық құрылыс, сәулет және қала құрылысы бөлімінің сектор меңгерушісі:
- Жоба бойынша 8,7 шақырым қарастырылған. Қазіргі таңда 7 шақырым ауызсу желісі жүргізіліп, аяқталып тұр. Жоба аяқталған жағдайда 74 тұрғын үй мен 5 әлеуметтік нысан ауызсумен қамтылатын болады.
Ауызсу жүйесі аудандағы төрт елді мекенге тартылып жатыр. Құрылыс жұмыстарының 70%-і орындалған. Мамандардың айтуынша, жоба толық аяқталған жағдайда Қазалы ауданы орталықтандырылған ауызсумен 100% қамтылады. Бұдан бөлек, облыс бойынша Арал ауданындағы үш ауылға ауызсу желісі тартылып жатыр.
Авторлары: Нұрлан Жақыпбеков, Нұржан Мұзарапшин, Айтмұхамбет Байділдаев
