Қарағандылықтар енді Түркияға тікелей тұрақты рейспен ұша алады. 4 маусымнан бастап Қазақстандық FlyArystan лоукостері жазғы маусымға Қарағанды – Ыстамбұл жаңа халықаралық бағытын іске қосты, деп хабарлайды Egemen.kz.
Airbus A320 ұшақтарымен аптасына екі рет – сәрсенбі және жұма күндері ұшулар орындалады. Ұшу уақыты – алты сағаттан сәл асады. Қарағандыдан ұшу – 14:20, Ыстамбұлға келу – 18:35. Қайтар рейс Ыстамбұлдан 19:20-да ұшып, Қарағандыға 02:30-да қонады.
Алғашқы жолаушыларды ұшар алдында салтанатты түрде шығарып салып, түрік тәттілерін ұсынды.
«Жаңа бағыттың ашылуы Қазақстан мен Түркия арасындағы әуе қатынасын нығайтудағы маңызды қадам болды. Қазақстанның дәл жүрегінде орналасқан, елдің жетекші өндірістік, білім беру және мәдени орталықтарының бірі – Қарағанды енді Түркияның ең ірі қаласы – Ыстанбұлмен тікелей әуе қатынасына ие болды», делінген әуе компаниясының хабарламасында.
FS7915 рейсі 29 тамызға дейін орындалады деп жоспарланған.
Алина ҚАЙРАТҚЫЗЫ, ЕҰУ студенті
