Бүгінде электр көлігін міну жаһандық үрдіске айналды. Былтыр әлемде тоқпен жүретін 15 млн темір тұлпар сатылған. Сұранысқа сай көлік өндірісі де қарқын алды, деп хабарлайды 24kz.
Қазір Еуропада тоқпен жүретін көлікке жаппай ауысқан елдер бар. Араб елдері де шет қалып жатқан жоқ. Мемлекет тарапынан салықтық жеңілдіктер, инфрақұрылымдық қолдау көрсетіп, нарықтың дами түсуіне ықпал етіп жатыр.
Норвегия жолдарын электр-кар мен сутегімен жүретін көлік жаулап алды. Скандинавия елінде сатылған 10 темір тұлпардың тоғызы – электромобиль. Яғни, көліктің бұл түріне сұраныс жоғары. Өйткен, электр-карларға мүлде салық салынбайды. Бұдан бөлек, тұрақ пен ақылы жол тегін.
Автобусқа арналған жолақты пайдалануға да рұқсат. Сондай-ақ Норвегияда электр тапшылығы жоқ. Яғни, тұрғындар электр-карды үйінде қуаттай береді.
Қытайда сатылған әр екінші көлік тоқпен жүреді
Электр-кар жасап шығаруда Қытай көш бастап тұр. Бұл елдің өндіріс қарқыны көз ілеспес жылдамдықпен дамып жатыр. Әлем нарығының 60%-ін Қытай электр көліктері құрайды. Электромобильдер саудасы жанармаймен жүретін көлікке қарағанда қарқынды. Былтыр елде сатылған әр екінші көлік – электромобиль. Бұған әлемде сұраныстың артуы себеп. Зауыттар қазір тек алдын ала тапсырыспен жұмыс істейді. Сондай-ақ шығыстағы көршіміз тоқпен жүретін көлікті жылдам қуаттау желісін құрмақ. Жоспарға сай 420 қалада 20 мыңнан астам қуаттағыш станция іске қосылады.
БАӘ халқының 82% электрлі көлікке көшуге ниетті
Біріккен Араб Әмірліктері халқының 82%-і электрлі көлікке көшуге ниетті. Сондықтан елде биыл 100 қуаттағыш станция салынады. Ал, 2030 жылға дейін оның саны 1 мыңға жеткізілмек. Осы арқылы алдағы 5 жылда көмірқышқыл газы шығарындыларын 100 мың тоннаға дейін азайту көзделген. Билік өкілдерінің сөзінше, бұл 2 млн ағаш еккенмен тең. Алдағы уақытта электрлі көліктерді қуаттау станцияларының қызметін пайдалану тегін болады.
Сауд арабиясы 5 жылда электр көліктердің үлесін 30% жеткізбек
Сауд Арабиясы электромобиль саласын дамытуы үшін әлі көп жұмыс істеуі керек. Айталық, бүгінде ел аумағында небәрі 101 қуаттау бекеті бар. Бұл көрші Біріккен Араб Әмірліктерінен екі жарым есе аз. Десе де, билік электромобильдер үлесін 5 жылда 30%-ке жеткізуді қалайды. Саланы дамытуға 39 млрд доллар бөлінген. Себебі ел үкіметі мұнайдан басқа салаларды дамытудың маңыздылығын түсінеді. Сондықтан осы нарыққа ден қойып, электромобильдер үлесін арттырмақ. Ал сарапшылар: «Бұл жаһандық трендтің өзгеріп жатқанының айқын көрінісі», - дейді.
Авторы: Зайнұр Байжігіт
