2025 жылдың 1 тамызы мен 20 қазаны аралығында Қазақстанда ұлттық ауыл шаруашылығы санағы өтеді, деп хабарлайды 24KZ. Павлодар облысында бұл санаққа 63 мыңнан астам үй шаруашылығы мен 7,5 мыңдай ауыл шаруашылығы өнімдерін өндірушілер қатысады.
Санақты жүргізуге арнайы оқытылған 130 интервьюер тартылады. Деректер заманауи планшеттердің көмегімен тіркеледі. Егістік алқаптарының көлемі, мал саны, техника мен өндіріс құралдары, сондай-ақ аграрлық өнім өндірісінің өзге де маңызды көрсеткіштері есепке алынады. Мамандардың айтуынша, науқан алдымен онлайн-сауалнама түрінде өтеді. Санақтың мақсаты – елдегі ауыл шаруашылығы қызметінің барлық түрін толық қамту. Сондай-ақ нақты статистикалық дерекке сүйене отырып, саланың даму бағытын тиімді жоспарлауды көздейді.
Жақан Жәкенов, Ұлттық статистика бюросы Павлодар облысы бойынша департаментінің басшысы:
- Санақтан онлайн түрде өтуді ыңғайлы қылу үшін жергілікті әкімдіктер мен аудандық статистика бөлімшелерінің ғимараттарында өзіне өзі қызмет көрсету аймақтары ұйымдастырылып жатыр. Біз азаматтарды санаққа саналы түрде қатысуға шақырамыз. Өйткені бұл жай статистикалық шара емес, барлық азаматтарды қамтитын мемлекеттік маңызы бар іс.
