Қырғызстандық азамат 20 жылдық мектеп бітіру кешінен кейін қызғаныштан әйелін атып тастады
Бұл туралы Caravan.kz медиа порталы хабарлайды.
Ош облысында мектеп бітіргендерге арналған 20 жылдық кездесуінен кейін ер адам әйелін қызғаныштан атып өлтірді. Қазір ол қамауға алынды. Бес кәмелетке толмаған бала жетім қалды.
Қайтыс болған әйел — бес баланың анасы. Ол отбасымен бірге Қара-Көлджа ауданына қарасты Сай ауылында тұрған. 26 мамыр күні күйеуімен бірге мектеп бітірушілердің 20 жылдық кездесуіне қатысу үшін Өзгөн ауданына қарасты Алға ауылына барған. Кештен кейін үйге оралған ерлі-зайыпты арасында жанжал туындап, соңы әйелдің өлімімен аяқталған.
Марқұмның сіңлісінің айтуынша, әпкесін күйеуі екі рет мылтықпен атып жіберген. «Сол күні бірге барып, бірге тұрған. Желіде түрлі жалған ақпарат тарап жатыр. Ол ешкіммен билеген де, ешкімнің қолынан ұстамаған. Кештен кейін үйге қайтқан. Үйде бірге отырып тамақтандық. Мені жолда түсіріп кетіп, екеуі әрі қарай кеткен. Барлығы сол кеште болған. Күйеуі оның оң жақ көкірек тұсынан атып жіберді. Басынан жарақат алмаған. Атпен сүйреді деген — өтірік», — деді сіңлісі.
Ал Алға ауылындағы мектеп директоры Мирбек Абдуллаев та кездесуге қатысқанын, бірақ күмәнді ештеңе байқамағанын айтты. «Сағат 9:00-де басталады деді, 9:15-те басталды, 11-де аяқталды. Бәрі тыныш өтті, ешқандай күдік тудырған жағдай болмады», — деді ол.
Сай ауылының басшысы Акунның айтуынша, отбасында бес бала бар, үлкені 11-сынып оқушысы немесе студент, қалғандары мектепте оқиды. Әйелі үй шаруасымен айналысқан, күйеуі анасына қарасқан. «Барлығы жақсы көрінетін. Әйелі тіпті үйден көп шықпайтын. Бұрын жәрдемақы алатын, кейін тоқтады. Күйеуінің 10 бауырлары бар, өзі ең кенжесі», — дейді ауыл басшысы.
Ош облыстық милициясы 27 мамырда таратқан мәліметке сәйкес, қылмыстық іс «Адам өлтіру» бабымен қозғалды. Күдікті — 1985 жылы туған азамат — уақытша ұстау изоляторына қамалды.
