Жыл соңына дейін елімізде екі су қоймасы пайдалануға беріледі.
Бұл туралы су ресурстары және ирригация министрілігінің өкілдері брифингте хабарлады. Жалпы Қазақстанның алты өңірінде 12 қойманың құрылысы мен жөндеу жұмысы жоспарланған. Атап айтқанда, Ақмола, Алматы, Батыс Қазақстан, Қостанай, Қызылорда және Түркістан облыстарында су нысандары бой көтермек. Бұдан бөлек, құзырлы орган жарты милионнан астам халқы бар екі жүзден астам ауылдағы ауыз судың сапасын жақсартуды қолға алмақ. Тіршілік нәрін сырттан алдыруға мәжбүр 52 ауыл алдағы уақытта сумен қамтудың орталықтандырылған жүйесіне қосылады. Ведомствоның қазіргі басты міндеттерінің бірі – шаруаларды сумен қамтамасыз ету. Бұл ретте суды үнемдеу технологияларын меңгеруге басымдық беріліп отыр.
Арсен Жақанбаев, ҚР СРИМ Су шаруашылығы комитетінің төрағасы:
- 2024 жылы Ақтөбе облысындағы Елек су қоймасын қайта жаңғырту, сондай-ақ 5 жыл бойы тоқтап тұрған Қызылорда су торабын қайта жаңарту жұмыстары аяқталды. Сондай-ақ біз Атырау облысы Индер ауданының Ақсай каналын реконструкциялауды және Түркістан облысында 9 су қоймасының инженерлік бекінісін жаңғыртуды аяқтадық. Жалпы мемлекте басшысы алға қойған міндеттерді орындау шеңберіңде бүгінде ауқымды жаңғыртулар іске асырылуда.
