9 желтоқсан күні толассыз жауған қар Алматы қаласының жүргізушілеріне қолайсыздық тудырған. Полиция қыметкерлері бір түнде 58 жол-көлік оқиғасын тіркеген, деп хабарлайды Egemen.kz.
Алматы полиция департаментінің мәліметінше, кешкі сағат 20:00-ден бүгін таңғы 06:00-ге дейін 58 жол-көлік оқиғасы тіркелген. Салдарынан 9 адам жарақат алды, қаза болғандар жоқ.
Полиция күшейтілген режимде жұмыс істеп, жол қауіпсіздігіне ерекше назар аударып отыр. Патрульдік полиция экипаждары барлық шақыртуларға жедел әрекет етіп, жол-көлік оқиғаларын ресімдеуді қамтамасыз етіп жатыр. Сондай-ақ көшелерді тазалау және жол жабындысын өңдеу жұмыстарына жұмылдырылған коммуналдық қызметтерге көмек көрсетуде.
«Алғашқы қар – жол қозғалысы үшін әрдайым сынақ. Біз жүргізушілерді барынша сақ болуға, қашықтықты және жылдамдық режимін сақтауға шақырамыз. Көлікті қыс маусымына алдын ала дайындау өте маңызды: шиналарды ауыстырып, техникалық жағдайын тексеру қажет. Егер автомобиль қысқы жағдайға дайын болмаса, жолға шықпаған жөн. Біздің басты міндетіміз – жүргізушілердің қауіпсіздігін сақтау», деді Алматы қаласы ПД Әкімшілік полиция басқармасының бастығы Серік Шұмаев.
Алматы полиция департаменті қала тұрғындарын жолда барынша сақ болуға, қысқы жағдайды ескеруге және жол қозғалысы ережелерін бұлжытпай сақтауға шақырады.
Айта кетейік, бұған дейін Алматы қаласында бір түнде жарты айдың нормасындай қар жауып тастағанын хабарлаған едік. Қардың қалыңдығы 35 сантиметрге дейін жеткен.
