Астана халықаралық форумының аясында сөз сөйлеген Руанда Республикасының Президенті Поль Кагаме мемлекеттердің тұрақты дамуы мен өсуінде қауіпсіздік мәселесінің ерекше маңызы бар екенін айтты, деп хабарлайды Skifnews.kz ақпараттық порталы.

«Қазақстанның өркендеуі – елдің мықты көшбасшылығы мен даму тұрақтылығының айқын көрінісі. Бұл форум тек пікір алмасу алаңы ғана емес, жаһандық прагматикалық ынтымақтастықтың маңызды орталығы ретінде қалыптасты», – деді Руанда басшысы.

Модератордың сұрағына жауап берген кезде Поль Кагаме өз елінің тарихи жағдайын мысалға тартты.

«Біз әрдайым өзіміздің тарихымыздан сабақ аламыз. Елдегі геноцид оқиғасын есте сақтаңыздар. Сол кезде кейбір мемлекеттер бізге көмектесуден гөрі назарларын басқа жаққа аударды. Алайда бұл біздің халықаралық серіктестік орнатуымызға кедергі болмады. Достық ниетпен көмектескен елдер мен серіктестеріміз көп болды. Дегенмен әрқайсымыз өз міндетімізді адал орындасақ қана бұл көмек нәтижелі болады», – деді ол.

Руанда Президентінің пікірінше, өткеннің қиын тәжірибелері кез келген елдің дамуы үшін қауіпсіздіктің маңызды фактор екенін дәлелдейді.

Сөзінің соңында Поль Кагаме Қазақстанға алғысын білдіріп, AIF алаңы арқылы әр мемлекеттің әлемдік ынтымақтастыққа өз үлесін қосуға мүмкіндік алғанын айтты.