Бас қалада Қазақстан машина жасаушылар одағының үйлестіру кеңесінің кезекті отырысы өтті.
Басқосу барысында секторға серпіліс беру ісі қаралып, 2028 жылға дейінгі жоспар пысықталды. Өнеркәсіптік роботтарды жедел енгізу мен өндірісті цифрландыру мәселелері қаузалды. Сондай-ақ кәсіпорындарды отандық шикізатпен қамтамасыз ету, қазақстандық тауар өндірушілердің тізілімін енгізу мәселелері де қаралды. Бүгінде елде машина жасау ісіне жіті қолдау көрсетіліп келеді. Тіпті арнайы салық жеңілдігі де қарастырылған. Өндірушілер импортталатын жабдықтар мен материалдарға қосылған құн салығынан 1 жылға дейін босатылған. Премьер-министрдің бірінші орынбасары Роман Склярдың төрағалығымен өткен жиынға Сенат төрағасы Мәулен Әшімбаев, «Бәйтерек» холдингінің басқарма төрағасы Рустам Қарағойшин және отандық жетекші кәсіпорындардың басшылары қатысты.
