Талдықорғанда Шерзат Болаттың өліміне қатысты іс бойынша сот процесі жалғасып жатыр , — деп хабарлайды Massaget.kz тілшісі.
Сот отырысында сот-медициналық сарапшы Өмірбек Жолымбетов жауап берді. Ол марқұм Шерзаттың ағасы Нұрқанат Ғайыпбаев төбелес кезінде алған жарақаттарды тексерген.
Өмірбек Жолымбетовтың айтуынша, жарақаттарға төбелестен жеті күн өткен соң сараптама жүргізілген. Оған дейін жарақаттар медициналық қорытындыда тіркелген. Сот-медициналық сараптама 9 қазанда жүргізілген.
Оның сөзінше, тексеру кезінде мына жарақаттар анықталған: оң көздің астыңғы қабағында көгерген ісік (3x1,5 см), оң жақ құлақтың артында дәл осындай көгерген жер (2x1 см). Сонымен қатар, желке тұсы ісінуі, бел тұсында ұзын жарақат (15x0,4 см).
Сарапшының айтуынша, терапевт дәрігердің тексеруінен кейін Нұрқанат Ғайыпбаевқа мынадай диагноз қойылған: бас-ми жарақаты, ми шайқалуы, маңдай жарақаты, желке тұсы көгеруі, кеуде қуысының жабық жарақаты, екі шынтақ буынының жарақаты, оң жақ бөкседегі бірнеше жарақат, оң жақ тізе буынының жарақаты.
"Бет, бөксе мен аяқ-қолдағы көгерген жерлер денсаулыққа зиян келтірмейтін жарақаттар ретінде бағаланды", – деді сарапшы.
Айыпталушылардың адвокаттары сарапшыға тек бөксеге тиген пышақ жарақаттары туралы сұрақтар қойды: "мұндай жаралар өлімге, мүгедектікке немесе есінен тануға себеп бола ала ма?"
Бұл сұрақтардың бәріне сарапшы "жоқ" деп жауап берді.
Алайда бас-ми жарақаты мен кеуде жарақатының зардабы туралы бірде-бір сұрақ қойылған жоқ. Бұл сұрақтарды жәбірленуші тараптың адвокаты қойды.
"Сіз мынадай диагноз қойғансыз: бас-ми жарақаты және бастың көгерген жерлері. Бұл мылтықтың сабымен жасалуы мүмкін бе? Мұндай жарақаттан адам есінен танып қалуы мүмкін бе?", — деді адвокат.
"Медициналық деректерге сүйене отырып, Ғайыпбаевқа бас-ми жарақаты, ми шайқалуы, маңдай аймағының жарақаттары мен сызаттары, желке тұсы көгеруі диагнозы қойылған. Бұл қорытындыны науқасты қараған невропатологтар мен мамандар жасаған. Мұндай зақым келгенде, яғни бас-ми жарақаты болса, адам есінен танып қалуы мүмкін", — деп жауап берді сарапшы.
Шерзат ісі бойынша сот отырысы
2025 жылы 10 cәуірде Талдықорғанда Шерзат Болаттың ісі бойынша сот процесі басталды. Шерзат Болаттың өліміне қатысты іс бойынша сот отырысы тікелей эфирден көрсетіледі.
Бұған дейінгі сот отырыстарында жәбірленуші тарап өкілдері, яғни марқұмның әжесі, ата-анасы, одан бөлек куәгерлер сөйледі.
Шерзат Болаттың өлімі туралы не белгілі?
Еске салайық, Талғарда 2024 жылы 4 қазанға қараған түні жасөспірім көз жұмды, кейінірек өңірдің Полиция департаменті осы оқиғаға қатысты мәлімдеме жасады. Ал марқұм Шерзаттың отбасы бұл жайтқа қатысы барлардың бәрін ұстап, жазалауды талап етті. Қалаға ІІМ тобы жіберілді.
Талғардағы қайғылы оқиға: бейнебақылау камераларының жазбалары өшірілгені рас па?
Марқұм Салтанат Нүкенованың ағасы Талғарда көз жұмған Шерзаттың отбасына тегін қорғаушы ұсынды. Сонымен қатар, Алматы облысы Полиция департаментінің өкілі Талғардағы жаппай төбелесте күдіктілер қандай суық қару қолданғанын айтты.
"Қазақ болып күресеміз". Заңгер Талғардағы жасөспірімнің өліміне қатысты істі соңына дейін жеткізетінін айтты.
Кейінірек полиция тағы да мәлімдеме жасап, халық арасында тараған "Талғардағы жасөспірімнің өліміне бандиттердің қатысы бар" деген ақпаратқа пікір білдірді. Ал 12 қазанда Шерзат Болаттың үйі өртеніп кетті. Артынша марқұмның отбасын полиция күзететін болды.
Талғарда қаза тапқан жасөспірімнің үйі өртенді: оқиға орнынан фотолар
Кейін Шерзаттың ағасы да өлі табылды.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
