Қазіргі уақытта табиғи аң терісінен жасалған бұйымдар, темекі өнімдері , аяқ киім және дәрі-дәрмек таңбалауға жатады.

Қазақстанда бизнес қауымдастығы мен мемлекеттік органдар тауарларды цифрлық таңбалау жүйесін кезең-кезеңімен енгізу жөнінде келісімге келді. Тауарлардың қадағалануы мен контрафактілік өнімдермен күрес мақсатында цифрлық таңбалау жүйесі енгізілуде. Бұл жүйе әрбір өнім мен қаптамаға Data Matrix форматындағы арнайы кодтарды қою арқылы жүзеге асырылады.

Қазіргі уақытта міндетті таңбалау келесі тауар топтарына енгізілген:

  • табиғи аң терісінен жасалған бұйымдар – 2019 жылғы 31 наурыздан бастап;
  • темекі өнімдері – 2020 жылғы 1 қазаннан бастап;
  • аяқ киім өнімдері – 2021 жылғы 1 қарашадан бастап;
  • дәрі-дәрмектер – 2024 жылғы 1 шілдеден бастап.

Қазақстан Үкіметі таңбаланатын өнімдер тізімін кеңейтуді жоспарлап отыр. Болашақта жүйе мотор майлары, киім-кешек, сыра және басқа да кең тұтынылатын тауарларды (КТТ) қамтитын болады.

Аталған жүйенің экономикалық тиімділігі бар болғанымен, КТТ өндірушілері мен импорттаушылар тарапынан алаңдаушылық та бар. Себебі таңбалауды енгізудің алғашқы кезеңінде жабдыққа, кодтарды басып шығару желілерін жаңартуға және қызметкерлерді оқытуға едәуір қаржы қажет болады. Сонымен қатар әрбір код үшін ақы төлеу қарастырылған. Бұл факторлар өнімнің өзіндік құнының өсуіне әкелуі мүмкін.

Еске салайық, бұл мәселелер 2 қыркүйекте Алматыда өткен дөңгелек үстелде де талқыланды. Іс-шараны Еуропалық бизнес қауымдастығы мен Қазақстандағы Америкалық сауда палатасы бірлесе ұйымдастырды. Онда Еуропа мен АҚШ-тың ірі компания өкілдері міндетті таңбалау мәселелеріне қатысты өз пікірлерін білдірді.

Кездесу қатысушыларының пікірінше, жоғары инфляция мен салық жүктемесінің артуы, соның ішінде ҚҚС мөлшерлемесінің көтерілуі жағдайында таңбалауды енгізуді кейінге қалдыру немесе оны кезең-кезеңімен енгізу, сондай-ақ кәсіпорындардың қаржылық шығындарын өтейтін тетіктер қажет.

Ал 7 қазанда Астанада өткен кездесу барысында премьер-министрдің орынбасары Серік Жұманғарин:

"Цифрлық таңбалау – көлеңкелі айналыммен күрес пен нарықтың ашықтығын арттырудың тиімді құралы. Алайда оны енгізу экономикалық тұрғыдан негізделген болуы тиіс. Үкімет бизнес шығындарын өтеу және үдерісті тиімді ету үшін салықтық ынталандыру тетіктерін қарастыруда", – деп атап өтті.

Тараптар таңбалауды кезең-кезеңімен енгізу қағидатын растады. Атап айтқанда, сыра өнімдерін міндетті таңбалау 2026 жылғы қыркүйектен бастап кегтерге, ал 2027 жылғы қаңтардан бастап бөтелке мен банка түріндегі өнімдерге енгізіледі.

Барлық мүдделі тараптардың – Үкіметтің, "Атамекен" ҰКП мен салалық қауымдастықтардың – белсенді қатысуымен таңбалау жүйесін енгізу жұмыстары осындай өзара түсіністік пен ынтымақтастық рухында жалғасады деген сенім бар.

Оқи отырыңыз:

  • Дәрі-дәрмекті таңбалау қымбатшылыққа әкеле ме? Министр жауабы
  • Таңбалау басталмай жатып, аяқ киім бағасы күрт өсті