5 қарашадан бастап Қазақстан аумағынан бұқашықтар мен тоқтыларды экспорттауға шектеу күшіне енді.
Ол алты айға жалғасады. Талап бойынша төрт айдан асқан еркек тоқтылар үшін экспорттық шектеу 120 мың бастан аспауға тиіс. Бордақылау алаңдары мен тауар өндірушілерге квота 60 мың бастан теңдей бөлінген. Ал ірі қараны, оның ішінде бұқашықтарды әкетуге мүлдем тыйым салынған. Бұл шектеу де алты айға жоспарланған.
Сонымен қатар жыл соңына дейін ел аумағынан сиыр етін сыртқа саудалауға квота енгізілмек. Ауыл шаруашылығы министрлігі бұл шешім елдің азық-түлік қауіпсіздігін қамтамасыз ету мақсатында қабылданғанын хабарлады. Одан бөлек, Қазақстан аумағына жұмыртқа импортына тыйым мерзімі тағы бір айға ұзартылды. Бұл шара да ішкі нарықты қорғау мақсатында қолға алынған.
