Ақмола облысындағы жолдардың жағдайы мәз емес, деп хабарлайды 24KZ. Қостомар, Исаков және Ұялы ауылының тұрғындары 30 жыл бойы жол азабын тартып келеді. Әсіресе көктем мен күзде көлік жүргізушілері бірнеше күнге жолда қалып, ми батпақтан шыға алмай әуре-сарсаңға түседі .
Көктем мен күзде Қостомар ауылы тұрғындарының құты қашады. Көшелер ми батпаққа айналады. Оған қоса езілген жолды жүк көліктері ойып кеткен.
Серікбай Нұрпейісов, Қостомар ауылының тұрғыны:
- Ауылдың ішінде жүре алмайды. «Колья» бәрі. Бүгін түсірілім тобы келеді деп естіді ме, 3-4 күннен бері трактор келіп, ауылдың ішін сырып жатыр. Ол енді жай көзбояу ғой.
Тұрғындар амалсыз осы жолмен қатынауға мәжбүр. Себебі бұл Көкшетау мен ауылды байланыстыратын жалғыз жол.
Юрий Епишин, Исаков ауылының тұрғыны:
- Осы жолмен жүреміз деп көлігімізді құрттық. Апта сайын жөндейміз. Ауылдағы зейнеткерлер ауруханаға жете алмай қиналады. Әсіресе көктем мен күз айларында қатынау мүлдем қиын.
Осыдан үш жыл бұрын Қостомардағы жолдың бір бөлігін ағымдағы жөндеуден өткен. Шамамен 20 шақырымдағы шұрық-тесікті жамауға облыс бюджетінен 40 млн теңге бөлінді. Бірақ бір жыл өтпей, грейдерлі жол бәз баяғы қалпына түскен. Жалпы Викторов мен Исаков бағытындағы жөндеуді қажет ететін жолдың ұзындығы 26 шақырым. Осы ретте жергілікті билік өкілдері екі жоба әзірлеп отыр.
Серік Исаханов, Зеренді ауданы әкімінің орынбасары:
- 15 шақырымды жобаның жалпы құны 1 млрд 230 млн теңгені қажет етеді. Ал 11 шақырымды жолдың жалпы құны 933 млн теңгені қажет ететін екі жоба бар. Бұл жобалар бойынша қаңтар айында облыстық бюджетке өтінім берілген болатын. Бүгінгі күні ақша бөлінген жоқ. Енді маусым айында өтетін сессияда тағы бір өтінім беріледі.
Осылайша барлық мәселе қаржыға тіреліп отыр. Дегенмен тұрғындар: «Атқамінерлердің бос уәдесіне тойындық», – дейді. Себебі олардың ұсыныс тілегі бірнеше жыл бойы орындалмай келеді.
Авторлары: Абзал Балтабаев, Евгений Шинкаренко, Виктор Полянный
