Джеффри Пьюн,
Аризона университетінің профессоры:
– Қазіргі жоғары оқу орны – тек дәріс оқитын орын емес, қоғамның интеллектуалдық қуатын қалыптастыратын, жаңа идеялар мен технологиялар өндіретін білім индустриясының басты өзегі. Университет енді тек білім беруші емес, елдің экономикалық, мәдени, инновациялық дамуына ықпал ететін орталыққа айналуға тиіс.
Бүгінгі заман университеті үш бағытта дамып келеді. Біріншіден, білімді беру, яғни оқыту үдерісі – кез келген оқу орнының басты миссиясы. Осы арқылы студенттер іргелі ғылымды меңгеріп, тәжірибелік қабілетін шыңдайды. Екіншіден, жаңа білім жасау – ғылыми зерттеу мен ізденістің нәтижесі. Нағыз университет жаңа идеяларды тауып, оларды ғылыми айналымға енгізеді. Үшіншіден, білімді айналымға енгізу, яғни алынған ғылыми нәтижелерді нарық талабына бейімдеу – қазіргі заман талабы. Бұл бағыт интеллектуалдық меншікті дамытып, жаңа технологияларды коммерцияландыруға жол ашады. Осы тұрғыдан алғанда, кейінгі жылдары Аризона университеті мен М.Қозыбаев атындағы Солтүстік Қазақстан мемлекеттік университеті арасындағы серіктестік – қазақстандық жоғары білім жүйесінің жаңа кезеңге аяқ басқанының айқын көрінісі. Төрт-бес жыл бойы табысты жүзеге асып келе жатқан микро-кампус жобасы соның дәлелі. Жоба аясында екі елден 200-ден астам студент білім мен тәжірибе алмасып, халықаралық ғылыми байланыс нығайды. Мұндай бастамалар Қазақстан мен АҚШ жоғары оқу орындарының ынтымақтастығын жаңа сапалық деңгейге көтеріп, білім беру кеңістігін халықаралық стандарттарға сай етуге мүмкіндік беріп отыр.
Менің пайымымша, ендігі негізгі мақсат – М.Қозыбаев атындағы Солтүстік Қазақстан мемлекеттік университетін тек оқыту бағытымен шектелмей, әлемдік деңгейдегі зерттеу университетіне айналдыру. Бұл – бір ғана оқу орнының емес, тұтас аймақтың ғылыми және технологиялық әлеуетін арттыруға бағытталған стратегиялық жоба. Зерттеу университеті дегеніміз – жаңа білім өндіретін, оны қоғам мен экономика қажетіне ұсынатын, инновациялық экожүйенің өзегіне айналған оқу орны. Егер М.Қозыбаев атындағы Солтүстік Қазақстан мемлекеттік университеті осы бағытта жүйелі түрде дамыса, онда аймақтық инновациялық кластерлердің, технопарктер мен стартаптардың қалыптасуына да қуатты серпін береді. Сондықтан қазіргі міндет – университеттің ғылыми инфрақұрылымын күшейтіп, халықаралық жобаларға белсенді қатысу, сондай-ақ жастарды зерттеу мәдениетіне баулу. Себебі ғылым мен білімнің тоғысқан тұсында ғана елдің интеллектуалдық әлеуеті артады.
