Кейінгі бір айда елімізде үш бірдей футболшы қайтыс болды.
Бұл туралы Caravan.kz медиа порталы хабарлайды.
Астаналық “Жеңіс” клубының әйелдер командасының ойыншысы Виктория Қайсаринова қайғылы жол апатының құрбаны болса, 15 жастағы «Ақтөбе» футболшысы Арон Мұса газға тұншығып көз жұмды. Ал үшінші футболшы — Диас Төлеу алаңда өзін жайсыз сезініп, есінен таңып, ауруханаға жетпей жан тапсырды.
Бір ай ішінде өрімдей үш бірдей футболшының қазасы қоғамда қызу талқыланып жатыр. Футбол сарапшылары мен спорт журналистері 19 жасында өмірден өткен Диас Төлеудің энергетик сусындарға әуес болғанын айтады.
“Бірінші бол” You Tube арнасының спикерлері осы ретте футболшылардың энергетик сусындарға тәуелділігі туралы сөз қозғады.
”Қазақ футболында назардан тыс қалған, айтылмай қалған мәселелер бар. Оның бірі — бірінші лигада ойнап жатқан Диас Төлеу деген футболшы алаңда, ойын барысында есін жоғалтып, ауруханаға жетпей өмірден өтті. Бұның барлығы жүйелі мәселелер шығар. Жастар арасында осындай жағдайлар көбейіп бара жатыр. Атырауда да “Қайсардың” ойыншысы өзін жайсыз сезінген. Қайта ол ауруханаға жетіп үлгеріпті. Футболдың айналасында жүрген адамдар бұл мәселені энергетик сусындарға тіреп жатыр”, — дейді Олжас Байбосын.
Ал Ермұхамед Мәулен әлемде мұндай оқиғалардың көп екенін айтты.
”2000-шы жылдардың ортасында Миклаш Фехер деген футболшы ойнап бара жатып, жүрегі тоқтап қалып, күліп өмірден өтіп кетті. Марк Виввен Фойенің де денсаулығы мықты еді ғой. Ол да орталық алаңда домалықтың ішіне барып қайтыс болған. Ондай оқиғалар өте көп. Кейде өзім де ішіп қоямын. Сол кезде байқаймын, денем дүңкілдеп, жүрегім дүрсілдеп, ұйықтай алмай қаламын. Ал оның үстіне футбол ойнаса, әрине зиян. Жас футболшылардың көбі Вардидың өмірбаянын оқып алады. Ол — матчтың алдында энергетик сусын ішіп алады екен. Бірақ, ол ағылшын ғой, энергетик сусынға дейін спирттік ішімдік ішеді ғой. Сондықтан оның жөні бір бөлек” — дейді ол.
Футболшы Елдос Ахметов те бір кездері энергетик сусындардан зардап шеккенін жасырмады.
”Мен де энергетик сусынды көп ішкенмін. Ойын алдында бір ред булл ішетінмін. Өзімнің дәстүрімнің бірі еді. Ол сенің бүкіл күшіңді бір сәтке әкеледі. Зиянды деп ойламайтынмын. Бірақ зардабы енді шығып жатыр. Жүрек қағысы, қан қысымында мәселелер ерте жастан туып жатыр. Ойыншы кезімде де, осыдан 3-4 жыл бұрын Алматы қаласында жаттығудың алдында отырые энергетик іштім. Тұрып келе жатқан кезде бірден әлсіреп кеттім. Қайтадан отырып, есімді жинаған кезде “өліп кетем” деген қорқыныш болды. Бұның себебі деп энергетик сусынды ойладым. Қазір мұндай сусындарға қарсымын. Жастарға, футболшыларға айтарым — ішпеңдер. Ұлттық құрамада өте көп ішеді”, — дейді футболшы.
