«Өмірге ғашықпын». Елордада осындай атаумен Қазақстанның еңбек сіңірген қайраткері, танымал эстрада және опера әншісі Толқын Забированың мерейтойлық концерті өтті. Салтанатты кешке Мәдениет және ақпарат министрі Аида Балаева қатысты. Министр Мемлекет басшысы Қасым-Жомарт Тоқаевтың құттықтауын жеткізді.
35 жыл. Отандық өнердің жарқын өкілі, ерекше талант иесі Толқын Забирова сахна сәніне айналғалы осынша уақыт. Күміскөмей әнші осы аралықта тыңдарманын қуантудан еш жалыққан емес. Оның ел және әлемдік мәдениетке қосқан өлшеусіз үлесін көзіқарақты көрермен ғана емес, Мемлекет басшысы да жоғары бағалады. Мерейтойлық концертте ел Президенті Қасым-Жомарт Тоқаевтың құттықтау хатын Мәдениет және ақпарат министрі Аида Балаева жеткізді. Еселі еңбек ескерусіз емес. Былтыр өнер иесіне "Парасат" ордені тағайындалған еді. Бүгінгі кеште сол марапат иесіне табыс етілді.
Толқын Забирова, әнші, «Парасат» орденінің иегері:
- САяқ асты сондай бір тосын сый болды. Ел Президенті осылай еңбегіңді елеп, қолдап, ықыласын білдіріп жатқанда бақытқа қалай бөленбейсің! Бұл менің кішігірім өнерімнің бағаланғаны. Болашақта тағы да әдемі дүниелерді жасауға қанаттанып отырмын.
«Өмірге ғашықпын» деп айдар тағылған кештің айтар ойы салмақты. Әнші оны анасының рухына арнағанын айтады. Тіпті ана жайлы ән шырқағанда көзіне жас алмаған көрермен кем де кем. Ел аузында жүрген танымал әндермен қатар сиясы кеппеген тың туындылардың осы концертте тұсауы кесілді.
Қазақстанның еңбек сіңірген қайраткері Толқын Забирова әлем мойындаған кәсіби әнші ғана емес, ұлағатты ұстаз. Оның шәкірттері бүгінде ізін жалғап, сахнада өнер көрсетіп жүр. Мерейтойлық кешке дарын иесін үзеңгілес достары, әріптестері қолдап келді. Көрерменнің де ықыласы ерекше.
Авторы: Назерке Тоқжанова
