Батыс Қазақстан облысында «Келешек мектептері» жобасы аясында былтырдан бері 3 оқу орны ашылды, деп хабарлайды 24KZ. Жыл соңына дейін тағы 6 білім ордасы бой көтереді. «Осы арқылы өңірдегі апатты мектеп азайып, үш ауысымда оқыту әселесі шешемін табады», – дейді жауаптылар. Жаңа үлгідегі білім ордасының ерекшелігі неде?
Зашаған кентіндегі №52 мектеп ақпан айының ортасында ашылды. 1500 шәкіртке лайықталған оқу орнында 1260 бала білім алады. Оқушылардың басым бөлігі №30 мектептен ауысты. Бұрын олар автобуспен қатынап оқитын, 700 орындық мектепте бала саны 2000-нан асатын.
Нұрлыгүл Жұбатова, Зачаганск кентінің тұрғыны:
- Мектептің осы ауданда ашылуын көп күттік, халық болып, ел болып, ата болып ұстаз болып дегендей. Бала – біздің болашағымыз. Осы жерде үлкен тұлғалар қалыптасады, солардың баспалдағы осы жерден қалыптасады. Мектеп жақсы, жарық, кең. Әр бала мектепке қуанып келеді.
Мәдина Әнуарбекеова, оқушы:
- Бұндай мектепте оқу мен үшін үлкен мәртебе деп айта аламын. Оқушылар үшін өте қолайлы. Сонымен қатар жоғары сынып пен бастауыш сынып оқушыларының бөлек блоктарда орналасуы үлкен сыныптар мен кіші сыныптардың бір-бірімен соқтығыспауына септігін тигізеді.
«Келешек мектептерінің» ауданы типтік білім ордаларына қарағанда 20%-ке кең болса, техникалық жарақтануы 4 есе артық. Әсіресе робототехника кабинеттері мен STEM-зертханалары балаларға тың мүмкіндіктер сыйлайды. Мәселен, Алтынбасар Бұрынбаев жаңа мектепте «Қара сақшы» деп аталатын әскери робот құрастырыпты.
Алтынбасар Бұрынбаев, оқушы:
- Бұл түрлі қауіпті жағдайларда адам шығынын азайтуға бағытталған робот. Ең басты технологиясы жасанды интеллектіде. Өз миы бар және қауіпті жағдайларда нақты шешімдер қабылдап, адам өмірін сақтауға мүмкіндік береді. Мына мектепте көптеген жағдай жасалған. Жаңа робот бөлшектері, жаңа технологиялар. Басқа мектептерде жоқ.
Өңірде былтырдан бері 9 «Келешек мектебі» тапсырылса, тағы 6 білім ордасының құрылысы жүріп жатыр. Оның үшеуі Бөрлі ауданында. Екеуі Бәйтерек ауданы, біреуі Орал қаласы Зашаған кентінде орналасқан.
Луара Батырғалиева, БҚО Білім басқармасы басшысының орынбасары:
- Ең басты үлкен ерекшелігі – эргономикалық кеңістіктің құрылуы. Яғни еңбек құралдары мен үдерістерді оңтайландыра отырып, еңбек етуге қолайлы жағдай жасалып отыр. STEM-зертханаларының, робототехника кабинеттерінің, үлкен хореография залдарының, 3-4 спорт залдарының, сыртқы алаңда спорттық- алғашқы әскери дайындық алаңдарының болуы – барлығы оқушылардың толық білім алуына жағдай жасайды.
Күні бүгін өңірде 17 мектеп апатты жағдайда деп танылған, ал 9 білім ордасында балалар үш ауысымда оқиды. Жыл соңына дейін тапсырылатын 6 «Келешек мектебі» осы мәселенің оң шешілуіне септігін тигізбек.
Авторлары: Е. Жылқайдарұлы, Қ. Ақрап, Э. Аюпов
