Қарағанды облысының Шет ауданында электр желілері әбден тозған, деп хабарлайды 24KZ. Жыл басынан бері 245 рет ақау шықты. Жел соқса, жарық өшеді. Осыған орай ақпан айында жергілікті төтенше жағдай режимі енгізілген болатын. Енді аудан билігі «Шет-Энерго» серіктестігінің балансындағы желілерді мемлекет меншігіне сатып алып, кешенді жаңғырту жұмыстарын қолға алмақ.

Сарапшылардың қорытындысы бойынша Шет ауданындағы электр желілерінің 90% тозған. Соның салдарынан биылдың өзінде 245 рет ақау шыққан. Электр бағандары, тоқпен жабдықтау құрылғылары әбден ескірген. Сәл жел тұрса, болды ауылдарда жарық сөніп қалады.

Талды ауылында да жарық жиі сөнеді. Себебі желілердің тозығы жеткен. Электр бағандарының кейбірі өртеніп кеткен. Осыған байланысты мамандар негізгі желінің бойына ажыратқыш орнатты. Енді ақау шықса, тек жөндеу жүргізілетін көше ғана тоқтан ажыратылады. Тұрғындар талай жылдан бері энергия тапшылығын көріп отыр. Желіде аяқасты ақау шыққан кезде көбінің тұрмыстық техникасы жанып кеткен.

Қайырбек Рахымберлин, Талды ауылының тұрғыны:

- Жарық енді жиі өшеді. Қыстыгүні бір аптадай жарық болмай қалады. Ауылда жарық жоқ, ол болмаса, байланыс жоқ. Қиын. Мынау техникалар жанып кетіп жатыр. Теледидар, тоңазытқыш, мұздатқыштар жанып кетіп жатыр.

21 ақпаннан бастап Шет ауданында жергілікті ауқымдағы төтенше жағдай енгізілді. Қыс ішінде 27 елді мекенге электр қуатын беруге шектеу қойылды. 3 мыңға жуық тұрғын үй, 43 әлеуметтік нысан бірнеше күн жарықсыз қалды. Аудан әкімдігінің мәліметінше, әбден тозған желілердің қуаты жетпейді. Қазір жеке серіктестіңтің меншігіндегі желілер 80-ші жылдан бері қолданыста екен.

Қайырғали Садықов, Шет ауданы әкімінің орынбасары:

- Энерго сарапшылар КТП-ларды, осы желілердің барлығын тексеріп, бүгінгі күні қорытындысын беріп отыр. 90% істен шығып тұр деп. Содан кейін енді желілерді бағалау жұмыстары жүріп жатыр. Ол осы айдың аяғына шейін дайын болады.

Тозған желілерді жаңғырту үшін дайындық жүріп жатыр. Қажетті ажыратқыш бөлшектер, трансформаторлар, өзге де жабдықтар алынды. Тек энергетикалық компания баласындағы желілерді бағалау жұмысы аяқталып, мемлекет меншігіне сатып алынған соң кешенді жұмыс басталады. Ал компания басшысының айтуынша, жыл сайын жөндеу жұмысына ақша бөлінген. Алайда шығынымыз көп, тариф төмен, қаржының жетіспеушілігі қолбайлау болды деген уәж айтты.

Құрманғазы Әміров, компания директоры:

- 2019 жылдан бері біздің тарифті түсірумен келеді. Мысалы, тарифімізді 98 тиынға дейін түсірді. Мен жылдағы мынау жұмыскерлерге төлейтін жалақым 35 миллион. 16 миллионға біз шикізат материалын аламыз, жылына 5-7 миллионның ішінде «ремонт» жасаймыз.

Бүгінгі таңда жергілікті билік елді мекендердің электр желілерінің бойына біртіндеп ажыратқыш орнатып жатыр. «Келешекте желілерді толықтай ауыстыру керек», – дейді мамандар. Жалпы аудан бойынша 27 ауылда жарық жиі сөнеді.

Авторлары: Руслан Нұрланұлы, Сайран Ақамбаев, Аман Хамит