«Тарифті инвестицияға айырбастау» бағдарламасы шеңберінде электр стансаларын жөндеп, жаңғырту үшін биыл 377 млрд теңге қаржы бөлінген, деп хабарлайды 24kz.
Бұл былтырғы көрсеткіштен 15%-ке жоғары. Сондай-ақ Үкімет резервінен жылу көздері мен жылу желілерін жөндеуге шамамен 48 млрд теңге қарастырылған.
Мирлан Алтынбек, тілші:
- Елдегі энергетика саласында тозу деңгейі жоғары. Осыны ескеріп, жылыту маусымына дайындық жұмыстары жоспарлы әрі сапалы жүргізілуі қажет. Өткен айдың соңында Премьер-министр Олжас Бектенов Үкімет отырысында осы мәселеге тоқталған еді.
Олжас Бектенов, ҚР Премьер-министрі:
- Солтүстік аймақтарда жылыту маусымы басталғанға дейін 1 айдан аз уақыт қалды. Алайда бірқатар өңірде жөндеу жұмыстары уақытылы аяқталмай қалу қаупі бар. Мұндай жағдайлар әкімдер тарапынан жоспарлаудың нашар болуы мен қатаң бақылаудың жоқ екенін көрсетеді. Кейбір облыстарда қысқа дайындық бойынша өңірлік штабтардың жұмысы мардымсыз болып отыр.
Мирлан Алтынбек, тілші:
- «Тарифті инвестицияға айырбастау» бағдарламасы аясында биыл электр стансаларындағы 10 энергия блогын, 63 қазандықты және 39 турбинаны жөндеу жоспарланған. Бүгінде 4 энергия блогын, 31 қазандықты және 20 турбинаны жөндеу жұмыстары түрлі кезеңде тұр. 5 энергия блогы, 22 қазандық және 12 турбинада жұмыстар аяқталды.
Сұңғат Есімханов, ҚР Энергетика вице-министрі:
- Әрине кестеде өзгерістер болуы мүмкін. Жөндеу жұмыстары басталғанда, құралдарды ашқанда қосымша жұмыстар шығады. Сондықтан оны тұрақты қысқа дайындық үшін анда-санда 2-3 аптаға ұзартуға мәжбүрміз. Бірақ ол жұмыстар бәрі бақылауда. Қалған құралдар ағымдағы жөндеуден өтеді. Жылу желілеріне көңіл бөліп жатырмыз. Өздеріңіз естігендей, 300 шақырымның 66%-і жөндеу жұмысы аяқталды. Солтүстікте ерте аяқталып жатса, оңтүстікте күн райының мүмкіндігі бар болғандықтан біз оны кештеу аяқтаймыз.
Мирлан Алтынбек, тілші:
- Энергетика министрлігі қыркүйек айынан бастап 257 мың тонна көлемінде «әлеуметтік» мазутты жеткізу кестесін бекітті. Ал көмірмен қамтамасыз ету бойынша нақты орындау мерзімдерін көрсетіп, халық пен бюджеттік ұйымдардың қара отынға қажеттілігін қалыптастыру жөніндегі жоспар әкімдіктерге орындауға берілді. Мәселен, алдағы жылыту маусымына көмір өніміне қажеттілік шамамен 7,7 млн тоннаны құрайды. Бүгінде шамамен 2,2 млн тонна жеткізілді, бұл жылдық жоспардың 29%-іне тең.
Берік Уәли, Абай облысының әкімі:
- Конкурстық рәсімдер кеш өткізілгенімен, қазіргі таңда жылыту маусымына дайындық жұмыстары қарқынды жүргізілуде. Облыс орталығы Семей қаласы 1-ші жылу электр орталығы (ЖЭО) және 19 қазандық жылумен қамтамасыз етеді. Қазіргі таңда 19 қазандық 13-і жылыту маусымына толық дайын. Қалған 6 қазандық олар резервтік қазандықтар. Жөндеу жұмыстары 25 қыркүйекке дейін толығымен аяқталады.
Мирлан Алтынбек, тілші:
- Айта өткен жөн, «Тарифті инвестицияға айырбастау» бағдарламасы аясында соңғы 2 жыл ішінде тұрғын үй-коммуналдық шаруашылық саласына 605 млрд теңгеден астам қаражат тартылды. Бұл 12 мың шақырымнан астам инженерлік желілерді жаңғыртуға мүмкіндік берді. Биыл жылу желілерін жөндеу мен реконструкциялауға 130 млрд теңгеге жуық қаржы бағытталады. Оның ішінде 104,2 млрд теңге бюджет қаражаты және қалған 25,2 млрд теңге кәсіпорындардың тарифтік сметасы шеңберінде жұмсалмақ.
Авторлары: Мирлан Алтынбек, Бағдат Қайыркен, Ернар Нысанбай
