Осы күні қаржы қызметін жасанды интеллект арқылы ұсынатын қосымшалар көбейіп келеді. Сарап шылардың пікірінше, қаржы нарығының болашағы – цифрлық трансформацияға тікелей тәуелді. Мұндай өзгерістердің негізінде тұрған ұғымның бірі – финтех, яғни қаржылық қызмет пен жаңа технологиялардың тоғысуы. Ол мобильді банкинг, онлайн-төлем жүйесі, криптовалюта платформасы, жасанды зердеге сүйенетін кеңесші сияқты халыққа қолжетімді әрі ыңғайлы қаржылық экожүйе құруға мүмкіндік береді. Дәл осы үдерістерді талқылауға арналған – «Astana Finance Days 2025» форумында басты назар финтех пен цифрлық инновацияларға ауды.
Айтулы жиынға әлемнің 70-тен астам елінен 5 000-нан аса қатысушы келді. Атап айтқанда, брокерлер, банкирлер, инвесторлар мен инноваторлар «Астана» халықаралық қаржы орталығында цифрлық инновациялар жөнінде пікір алмасты. Биылғы іс-шараның тақырыбы – «Болашақтың негізін қалайтын капитал».
Форумның ашылуында АХҚО Басқарушысы Ренат Бектұров қаржы индустриясындағы жаңа трендтерді саралап, әсіресе цифрлық активтер мен жасанды интеллектінің ықпалына ерекше тоқталды.
«Жыл сайынғы «Astana Finance Days» форумы заманауи трендтер мен сын-қатерлерді талқылауға, сондай-ақ оларды еңсеру жолдарын іздеуге арналған Еуразия аумағындағы бірегей алаң ретінде өз мәртебесін дәлелдеді. Биылғы форумға шамамен 1,5 трлн доллар көлеміндегі активтерді басқаратын компания өкілдері қатысып отыр. Сонымен қатар AFD жаңа серіктестіктерді құруға және нарық үшін маңызды жаңалықтарды жариялауға арналған платформа ретінде жұмысын жалғастырып жатыр. Мәселен, форум аясында стейблкоиндарды пайдалану мүмкіндіктері, цифрлық активтер мен әлеуметтік облигациялар саласындағы жаңа листингтер, исламдық қаржы секторы бойынша бастамалар жарияланады. Бұл еліміздің қаржы нарығы жаңа дәуірге аяқ басқанын білдіреді. Форум бағдарламасы кәсіби нарық қатысушылары үшін де, цифрлық қаржыға қызығушылық танытатын кең аудитория үшін де мазмұнды әрі қызықты болмақ», деді Ренат Бектұров.
Форумның басты спикерлерінің бірі – әйгілі футуролог, кәсіпкер әрі «Банк 4.0: Жаңа қаржылық құбылыс», «Техносоциализм. Теңсіздік, жасанды интеллект пен климаттың өзгеруі қалай жаңа әлемдік күн тәртібін қалыптастырады?», «Кеңейтілген кеңістік дәуірі» және басқа да әлемдік бестселлерлердің авторы Бретт Кинг болды.
«Біз жасанды интеллектінің пайда болуынан бастап климаттық факторлардың ықпалына дейінгі орасан зор өзгерістер дәуірінде өмір сүріп жатырмыз. Алайда қазірдің өзінде әлемдік банк саласы цифрлық технологиялардың арқасында терең трансформациядан өтіп жатыр. Мәселен, финтехтің клиенттері дәстүрлі банктерге қарағанда 50%-ға көп. Автономды жабдықтау тізбектері мен «ақылды» экономикалар мүлде жаңа банктік инфрақұрылымды қажет етеді, сондықтан стейблкоиндар мен жедел төлем жүйелері қарқынды дамып келеді. 2050 жылы банк секторы мүлде басқаша болады», деді Бретт Кинг.
Форум барысында «Commodity Tokenization» атты қанатқақты жоба таныстырылды. Бұл бастама Еуразия елдерінде ауыл шаруашылығы өнімдерін цифрландыруды көздейді. Жоба аясында блокчейн негізінде астықты есепке алу, сақтау, саудалау және қаржыландырудың бірыңғай цифрлық экожүйесі құрылады. Бұл қадам еліміздің агроөнеркәсіптік секторына қосымша инвестиция тартуға және өнімділікті арттыруға жол ашады.
Форумның тағы бір сессиясында «АХҚО соты мен Халықаралық төрелік орталығы: сот төрелігінің цифрлық трансформациясы» тақырыбы қозғалды. Сарапшылар дау-дамайды онлайн шешу жүйесінің дамуы мәселесін, сондай-ақ цифрлық технологиялар арқылы инвестициялық капиталды қорғау мүмкіндіктерін талқылады. Бұл да еліміздің құқықтық экожүйесін жаңа деңгейге көтеретін маңызды қадам саналады.
Жиын аясында АХҚО Академиясы SDU және AlmaU университеттерімен бірлесіп әзірлеген қаржылық майнор бағдарламаларын таныстырды. Майнор – студенттің негізгі мамандығына қосымша оқитын бағыт, яғни толыққанды екінші диплом емес, бірақ қосымша білім мен дағды береді. Бұл – болашақ мамандарды цифрлық экономикаға бейімдеуге бағытталған айрықша оқыту әдісі.
«Astana Finance Days 2025» осылайша қаржы технологияларының орталығына айналып қана қоймай, жаңа идеялар мен стартаптарға жол ашып отыр. Ал сарапшылардың айтуынша, осы бағыттағы батыл қадамдар елдің ғана емес, тұтас өңірдің дамуына ықпал етпек.
