Қызылордада 300 орындық балалар лагері мен ботаника бағы салынады, деп хабарлайды 24kz.
Бұл нысандар жаңғыртудан өтіп жатқан Президент саябағының аумағынан бой көтереді. Облыс әкімі Нұрлыбек Нәлібаев бір топ ардагермен бірге жаңғырту жұмыстарын көріп, жаңа жобалармен танысты. Аймақ басшысы құрылысы жүріп жатқан бес жұлдызды қонақ үй мен тұрғын үй кешеніне де барды.
Қаласында салынып жатқан бес жұлдызды қонақ үйдің құрылысы мамыр айында басталды. Нысанның жалпы ауданы 27 мың шаршы метр. «Бұл жоба өңірде туризмді дамыту үшін маңызды», - дейді серіктестік басшысы.
Еркебұлан Нарбаев, серіктестіктің бас директоры:
- Құрылыс жұмыстарының негізгі мерзімі 24 ай болып белгіленген. Бірақ біз өзіміздің жоспарымызда 12-14 айда бітіріп, келесі жылдың аяғында қонақ үйді ашамыз деген жоспарымыз бар.
Қонақ үй жанынан зәулім тұрғын үй кешені де бой көтеруде. Комфорт санатындағы 9 қабатты 15 тұрғын үйге 945 отбасы қоныстанады.
Ерлан Төрәлиев, облыстық құрылыс, сәулет және қала құрылысы басқармасының басшысы:
- Жылдың аяғына дейін біз су, жылу, жарық, канализация жүйелерін әкеліп қосамыз. Үйлер биыл басталып, келесі жылы пайдалануға беріледі. Сол кезде бүкіл абаттандыру, инженерлік жүйелер мәселесі шешіледі.
Президент саябағы да қайта жаңғыртылуда. Жоба бойынша мұнда заманауи атракциондар мен спорт алаңдары, су бұрқақтар болады. Сонымен қатар 300 орындық балалар лагері мен ботаника бағы бой көтереді.
Сәпен Аңсатов, еңбек ардагері:
- Елдің мерейі өседі, мәртебесі өсетін, қаланың көркі көріктене түсетін, жаңғыра түсетін сәулеті жарасқан сол жақ жағалаудан үлкен қала бой көтеріп жатыр. Соған біз көрдік, таныстық, риза болдық.
Президент саябағы мен «Астана» шағын ауданын байланыстыру үшін Сырдария өзенінің үстінен жаяу жүргіншілер көпірі салынады. Нұрлыбек Нәлібаев жауапты мамандарға құрылыс жұмыстарын сапалы жүргізіп, уақытылы аяқтауды тапсырды.
Авторлары: Нұрлан Жақыпбеков, Ақан Әлиев
