Биыл «Ауыл құтқарушылары» бағдарламасы іске қосылды .
Бұл бастама облыс орталығынан шалғай жатқан ауылдарда өрт сөндіру бекеттерін ашуға мүмкіндік беріп отыр. Қажетті техника мен құрал-жабдықтар Төтенше жағдайлар министрлігі тарапынан бөлінеді. Жаңа жоба – алыс ауылдарда өрт шыққан жағдайда, жедел әрекет етуге қолайлы жағдай туғызып отыр. Еліміздің шығыс өңірінде бұл тәжірибе қалай жүзеге асып жатыр?
Дала өрті қас-қағым сәтте тұтанып, әп-сәтте үлкен аумаққа таралуы мүмкін. Бұрын мұндай жағдайда тұрғындар аудан орталығынан келетін көмекке ғана үміт артып, өрттің өшуін күтіп шарасыз күйде қалатын. Құтқарушылар жеткенше үй-жайлар мен егіс алқаптары күлге айналған сәттер де болды. Бірақ биыл жағдай өзгерген. «Ауыл құтқарушылары» бағдарламасының арқасында өрт сөндіру бекеттері тікелей ауыл ішінде ашылып жатыр. Бұл кез келген төтенше жағдайға шұғыл әрекет етуге мүмкіндік береді.
Ерлан Төрегелдиев, ҚР ТЖМ Өртке қарсы күрес комитетінің төрағасы:
- Мысалға алсақ, еліміз бойынша 6 мыңнан астам елді мекен бар. Әр ауылда мемлекеттік өртке қарсы күрес бөлімшесін қою мүмкін емес. Сондықтан жергілікті атқарушы биліктің қолдауымен, жанашыр азаматтар мен шаруа қожалықтары бірлесіп осындай бекеттерді құрып жатыр.
Шемонайха ауданына қарасты Усть-Таловка ауылында қазір өрт сөндіру бекеті жұмыс істеп тұр. Мұнда екі арнайы техника бар, оның бірі — ТЖМ тарапынан берілген.
Юрий Андреев, Усть-таловка кенті Өрт сөндіру бекетінің қызметкері:
- Біз Усть-Таловка кентімен қатар Заречное, Берёзовка, Половинка және Конёвка ауылдарына қызмет көрсетеміз. Тек Усть-Таловканың өзінде 4 мыңнан астам адам тұрады. Мұнда 20-дан астам көпқабатты үй бар.
Бір ғана бекет 6 мыңға жуық адамның қауіпсіздігін қамтамасыз етіп отыр. Бұл тәжірибе көрші ауылдарға да үлгі болды. Мәселен, Сугатовка ауылында заманауи өрт сөндіру нысанын салу жоспарланып отыр.
Қазыбек Қажақанов, Сугатовка ауылы өндірістік құрылым басшысы:
- Мен болашақта бекет салуға болатыны туралы естідім. Біз оны негізге аламыз деп ойлаймын. Біз үшін өте қажет, өйткені жеріміздің көлемі үлкен, 3 елді мекен, шабындық алқаппен қоса жайлауымыз бар.
Осындай өрт сөндіру бекеті Глубокое ауданының Тарханка кентінде де салынады. Қазіргі таңда Шығыс Қазақстан облысы бойынша ондаған бекет құрылып, жұмысын бастап кетті. Олардың материалдық-техникалық жабдықталуын Төтенше жағдайлар министрлігі қамтамасыз етеді. Ауылдағы қауіпсіздікті арттыруға бағытталған бұл жоба өз тиімділігін көрсетіп жатыр. Бұл – тек табиғатты ғана емес, адам өмірін де сақтап қалуға жасалған нақты қадам.
Қарлығаш Қасиетова, Әнел Есенбердина, Жігер Бабақанов, 24KZ
