Жоғары оқу орындарында ахуал және дағдарыс орталықтары жұмыс істейді, деп хабарлайды 24kz.
Онда студенттерге жатақханалар туралы мәлімет беріледі және уақытша жатын орынмен қамтамасыз етіледі. Орын тапшылығы мәселесі Алматы қаласында күйіп тұр. Онда 8000 студент жатақханаға қол жеткізе алмай жүр. Ғылым және жоғары білім министрлігінің мәліметі бойынша елде 4 жаңа жатақхана іске қосылды. Ал жылдың соңына дейін тағы 25 ғимарат тапсырылады. Студенттерді жатын орынмен қамту кезінде ең алдымен әлеуметтік осал топтарға басымдық беріледі.
Ақерке Абылайхан, ҚР Ғылым және жоғары білім министрлігінің комитет төрағасының м.а.:
- Субсидия бөлінетіндіктен, біз Алматы, Астана қалаларындағы инвестор болып, жекеменшік әріптестік аясында жатақхана салған бизнесмендерге жатақханада тұру құнын 40 мың теңгеден асырмауды міндеттеп, жүктедік. Келесі мәселе – барлық университеттің қасында ахуалдық және дағдарыс орталықтары ашылған. Әрбір университеттің әлеуметтік желісінде ахуалдық орталықтың телефон нөмірлері берілген.