Биыл Шығыс Қазақстан облысында республикалық маңызы бар 357 шақырым жол жөнделеді, деп хабарлайды 24kz.

Мамандардың айтуынша, әсіресе, бірнеше жыл бойы қараусыз қалған учаскелерге назар аударылады.

Солардың қатарында Өскемен – Шемонаиха тасжолы бар. «Трансшекаралық трассаға кейінгі 7-10 жыл көлемінде дұрыс жөндеу жүрмеген», — дейді мамандар. Сондықтан тоз-тозы шыққан жол ресайклинг әдісімен жаңартылып жатыр.

Шығыс Қазақстанда республикалық маңызға ие 7 бағыт бар. Солардың ішінде Өскемен – Шемонаиха трассасының орны айырықша. 120 шақырымды құрайтын трансшекаралық автожол Ресейге апарады. Екі ортада ары-бері ағылған көлік көп. Николай Хорошаев қызметіне байланысты осы жолмен жиі өтеді. Сондықтан әр шұңқырын жатқа біледі.

Николай Хорошаев, көлік жүргізушісі:

- Толық қалыпқа келтірмесе болмайды. Ой-шұңқырын айналып өту мүмкін емес. Әдейі асты биік автокөлік сатып алдым. Бұл жол барлығымызды да мезі етті.Жыл сайын кетеуі кетіп барады.

Жыл сайын жамалып қана келген бұл жол енді орташа жөнделіп жатыр. «Демек, тақтайдай түзу трассамен жүретін күн де алыс емес», — дейді мамандар. Жолдың жағдайын зерттеген жұмысшылар рейсаклинг әдісін қолдануды жөн көріпті.

Сейіл Сокиров, мердігер компанияның жоба жетекшісі:

- Жолдың табанын қалыпқа келтіру үшін цемент пен ұсақ тас қоспасын қолданып жатырмыз. Бұл кедір-бұдыр қабатты тегістеп шығады деуге болады. Кейін асфальт жабындының беріктігін арттырады.

Биыл бұл бағыттың 92 шақырымы жөнделеді.Әзірге 30%-і аяқталды. Барлық технологиялық талаптардың сақталуы да басты назарда. Жол активтері Ұлттық сапа орталығының мамандары 16 рет тексеріп, 55 материалдан сынама алған.

Саяхат Мұсапыров, «Жол активтері сапасы ұлттық орталығы» ШҚО филиалының бөлім басшысы:

- Бүгінгі таңда оның 6 материалы талапқа сай емес болып анықталды, оның қазіргі таңда үшеуі жойылды. Одан басқа тағы 6 ақау анықталды, ол да жойылу барысында.

Өскемен – Риддер, Өскемен – Алтай автожолдары да биыл жаңартылады. Жалпы аймақта тозығы жетіп тұрған 360 шақырымға жуық жол жөнделеді.

Алмас Хасенов «Қазавтожол» ҰК АҚ шқо филиалы директорының орынбасары:

- ШҚО-да биыл осы 357 шақырымды жөндеужоспарланып отыр және сонымен қатар қайта жаңарту жұмыстары бар. Ол өздеріңіз білетін Қалбатау – Майқапшағай, Талдықорған – Қалбатау – Өскемен тасжолдары.

Тұтас облыста республикалық маңыздағы жолдарды орташа жөндеу мен қайта қалыпқа келтіру үшін 44 миллиард 600 миллион теңге қарастырылған.

Авторлары: Эльмира Ахметова, Жігер Бабаханов