Түркістан облысының Созақ ауданында жұмысшы мамандар даярлайтын кәсіптік колледж жанынан 120 орындық жатақхана құрылысы басталды.

Оқу орнының бұрынғы жатақханасы әбден ескіріп, тозғандықтан оны бұзып, орнына жаңасы салынып жатыр. Колледждің техникалық базасы қалай? Оқытушыларының біліктілігі, түлектердің жұмысқа орналасу көрсеткіші қай деңгейде?

Созақ ауылының тұрғыны Қалбибі Шавхадқызы кәсіптік колледждің 3-курс студенті. Тігінші мамандығы бойынша білім алуда. Оқу орнының бұрынғы жатақханасы өте ескі болғандықтан көптеген ата-аналар балаларының онда тұруына қарсы болғанын айтады.

Қалбибі Шавхадқызы, студент:

- Біздің колледжде сырт жақтан келіп оқитындар өте көп. Тіпті қаладан келіп оқитындар бар. Кейбір оқушылар шеберлердің үйінде жатып оқып жатыр. Сондықтан қазіргі жаңа жатақхананың құрылысының басталғанына біз өте қуаныштымыз. Ертерек бітсе екен дейміз. Сырттан келетін оқушыларға өте қолайлы болмақ.

Ал дәнекерлеуші мамандығының 1-курс студенті Бекжан Құнар Қайнар ауылынан күнделікті қатынап оқиды. Егер жатақхана болса, жатып оқығанға не жетсін дейді.

Бекжан Құнар, студент:

- Жатақхананың болмауына байланысты біз осы жерге қатынап оқып келе жатырмыз. Қазір жатақхана салынып жатыр. Егер ертерек бітіп жатса, біз сияқты шет жақтан келетін балаларға өте керемет болатын еді.

Созақ ауылында орналасқан оқу орнының іргетасы өткен ғасырдың 60-жылдары қаланған. Кәсіптік колледжде 450 бала, ауыл шаруашылығы, дәнекерлеуші, токор, жүргізуші, бұрғылаушы, химиялық талдау сияқты 11 мамандық бойынша білім алуда. Биылғы "Жұмысшы мамандықтар" жылына орай ескі жатақхана бұзылып, орнына 2 қабатты 120 орындық жаңа ғимараттың құрылысы басталған. Қазір іргетасы құйылып жатыр. Жоба құны — 718 млн теңге.

Азамат Бегетаев, мердігер:

- Ішінде асханасы, жуынатын орыны болады. 2-3 адамдық бөлмелер болады. Бұл жерде қазір 1 бетон араластырғыш көлік, 2 погрушок, 15 адам жұмыс істеп жатыр. Ертең бетоннан шыққан кейін кірпішті өретін кезде адам саны артады. Биылғы жылдың соңына қарай аяқтаймыз деген жоспарымыз бар.

«Жұмысшы мамандықтар жылына» орай, оқу орнының басшылығы Созақ өңірінде жер қойнауын пайдаланушы ірі компаниямен меморандумға отырған. Соның аясында студенттер өндіріс алаңында тәжірибеден өтіп, жұмысқа қалуға мүмкіндік алған. Тіпті компания өздеріне қажетті маман даярлау үшін оқу орнын қажетті материалдық базамен қамтамасыз етуге келіскен.

Бақдәулет Қардашбеков, колледж директоры:

- Биыл «Жұмысшы мамандықтар жылының» аясында бұл кісілер өздері ұсыныс беріп, мынадай мамандық керек деп сұраныс беріп, студенттерді апарып, тәжірибеден өткізу деген үлкен жетістік. Ертең бізде бітірейін деп жатқан студенттерден 20-25 бала толық қанды жұмыспен қамтылады деп есептеп отырмыз. Себебі сұраныс бар.

Бұрын колледж бітірген түлектердің өз мамандығы бойынша жұмысқа орналасу көрсеткіші 70 пайыз болса, енді осы келісім негізінде 90-95 пайызға дейін артады деген сенім бар.

Жандос Жұмабек, Ерболат Әбіш, Қуаныш Абуов