Бұдан былай Қытайда мектепке дейінгі білім беру тегін болады. Қазір заң күшіне енді. Алдағы күз айларынан бастап миллиондаған бала ақысыз тәрбиеленеді. Мұндай реформа көрші елде бұрын-соңды болмаған, — деп хабарлайды Massaget.kz тілшісі 24.kz-ке сілтеме жасап.
Қытай үкіметі бұл қадамға елдегі демографиялық ахуалға байланысты баруға мәжбүр. Өйтпеске амал жоқ. Бала туу деңгейі төмендеп кеткен. Кейінгі бес жылда сәбилердің дүниеге келу көрсеткіші 12 млн-ға дейін азайды.
Салдарынан 41 мыңға жуық балабақша жабылып қалды. Демограф мамандар дабыл қағып ел билігі бұл мәселені ерекше назарға алды. Жастары балалы болуға асықпайды. Оған түрлі факторлардың әсері бар. Солардың бірі қаражат. Жүргізілген талдауға сәйкес елде бала туып, оны тәрбиелеп жеткізу қиын. Тым қымбат. Билік осыны ескеріп түрлі реформалар жасай бастады. Қытайлар мектепке дейінгі білім беруді тегін етіп, осы арқылы ата-аналардың қалтасына түсетін қаржылай салмақты азайтпақ. Бірақ мектепке дейін тегін білім беру саясаты кезең-кезеңімен жүзеге асырылады. Бұл туралы қытайдың қаржы министрінің орынбасары Го Тинтин мәлімдеді.
"Бала күтімі және білім беру жеңілдейді. Бұл халыққа түсетін қаржылық салмақты азайтып мемлекеттік білім берудегі қызмет сапасын жақсартуға бағытталған шешім. Алайда осыдан кейін балабақшалардың табысы қысқарайын деп тұр. Бұл да қоғамда бірқатар мәселелерді туғызды. Талдай келе төлемнен босатылған күннің өзінде мемлекет мектепке дейінгі білім беретін мекемелердің шығынын субсидиялап береді", — деді ҚХР қаржы министрінің орынбасары Го Тинтин.
Бастапқыда 12 млн бала қамтылады. Олар балабақшаларды тәмамдайтын жоғары топтарды бітіретін балалар. Жаңа жүйе бүкіл ел аумағында күз айларынан бастап жүзеге асады. Түпкі мақсат елдегі бала туу көрсеткішін арттыруға негізделіп отыр.
Өзекті жаңалықтарды өз уақытында оқу үшін Facebook парақшамызға жазылыңыз!
