Премьер-министрдің орынбасары Қанат Бозымбаев Жамбыл облысына жұмыс сапарымен барып, оңтүстік өңірлердің әлеуметтік-экономикалық дамуы мен «Ауыл аманаты» жобасының іске асырылу барысы бойынша кеңес өткізді, деп хабарлайды El.kz ақпарат агенттігі.
Облыстық әкімдік мәліметінше, жиынға Жамбыл, Түркістан, Қызылорда облыстары мен Шымкент қаласының әкімдері, министрлік және Amanat партиясының өкілдері қатысты.
Кеңесте ұлттық экономика вице-министрі Бауыржан Омарбеков пен қаржы вице-министрі Абзал Бейсенбекұлы баяндамалар жасап, өңірлік көрсеткіштер мен қаржыландыру мәселелерін ортаға салды. Облыс және қала әкімдері өз ұсыныстарымен бөлісті.
2025 жылдың алғашқы төрт айында Жамбыл облысының экономикалық өсімі 15,8 пайызды құрады. Өсім өнеркәсіп, құрылыс, көлік және байланыс салаларындағы қарқынмен қамтамасыз етілген. Инвестиция көлемі 66,8%-ға өсіп, 173,2 мың шаршы метр тұрғын үй пайдалануға берілді.
Оқи отырыңыз:
- Жетісу форумында өңірлік дамудың инновациялық шешімдері ұсынылды
- Бектенов Алматының әлеуметтік-экономикалық дамуымен танысты
Кеңесте Қанат Бозымбаев ауыл шаруашылығы мен шағын бизнестің өңірлік дамудағы маңызын атап өтіп, инфрақұрылымдық жобаларды Өңірлік стандарттар жүйесіне сәйкестендіру қажеттігін ескертті.
«Ауыл аманаты» жобасы аясында 153 ауылдық округке скрининг жүргізіліп, олардың негізгі мамандануы анықталды. Биыл бұл жоба аясында 5 млрд теңгеге 700 жоба қаржыландырылып, 800-ден аса жұмыс орны ашылады деп күтілуде. 2019–2023 жылдары аралығында 8 027 жоба жүзеге асырылып, 62 кооператив құрылды, 275 ауыл шаруашылығы техникасы сатып алынған. Несие қайтарылымы – 99,6%.
Жобаның ерекше бағыты – әлеуметтік жағдайы төмен отбасыларға арналған тауарлық несие. Қазірдің өзінде 20 отбасыға 757 бас мал берілді, жыл соңына дейін 5 мыңнан астам мал таратылады, — делінген мәліметте.
Қанат Бозымбаев Үкіметтің бұл жобаны жетілдіру, атаулы әлеуметтік көмек алушыларды тарту, кооперативтерге жер бөлу және басқа да бағыттарда жұмысты күшейту керектігін атап өтті.
Сапар барысында вице-премьер Қазақ ұлттық су шаруашылығы және ирригация университетінің ахуалымен, Тараз қаласындағы көпқабатты үйлердің құрылысы және «Түйте» каналының абаттандыру жұмыстарымен танысты.
