Yandex Qazaqstan 2024 жылдың шілдесінен 2025 жылдың шілдесіне дейінгі аралықта Алисасы бар ақылды колонкалардың сату статистикасын жариялады. Өткен жылмен салыстырғанда сатылым көлемі 60 пайызға артты, ал қазақстандық сатып алушылар арасында ең танымал модель — Станция Лайт болды. Мұндай өсімге жаңа Станция үлгілерінің пайда болуы мен колонкаларда қазақ тіліндегі Алисаның іске қосылуы себеп болды.
Жыл қорытындысы бойынша, бірінші буындағы Станция Лайт жалпы сатылымның 33 пайызын құрады. Екінші орынды өткен күзде таныстырылған жаңа дизайны мен эмоциялық синтез технологиясы бар Станция Лайт 2 иеленді — оның үлесі 19 пайыз. Үшінші орында — Станция Мини 2 (17 пайыз). Ең жоғары сұраныс Жаңа жыл және 8 наурыз қарсаңында тіркелді — бұл кезде колонкалар жиі сыйлық ретінде сатып алынды.
Сату статистикасына сүйенсек, қазақстандықтар функционалдығы жоғары әрі техникалық жағынан күрделі ақылды колонкаларды жиі таңдай бастады. Өткен жылмен салыстырғанда сатылымы ең көп артқан құрылғы — Станция Миди, өсім 237 пайызды құрады. Бұл құрылғы нейрондық процессор мен ақылды үйді басқаруға арналған Zigbee модулімен жабдықталған. Екінші орында — компанияның экраны бар алғашқы колонкасы — Станция Дуо Макс (өсімі — 166 пайыз). Екі құрылғы да 2023 жылдың күзінде нарыққа шыққан.
Соңғы бір жылда Алисасы бар бес жаңа колонка сатылымға түсті. Олардың қатарында — жоғарыда аталған Станция Лайт 2, Станция Мини 3 Про, Станция Мини 3, алғашқы портативті колонка — Станция Стрит, сондай-ақ сағаты жоқ Станция Лайт 2 бар.
Қазақстанда Yandex Qazaqstan ұсынатын ақылды үй құрылғыларына да қызығушылық артып келеді. Оларға ақылды розеткалар, шамдар, үйді басқаруға арналған хаб, қозғалыс, су ағу және есік ашылуын бақылау датчиктері жатады. 2024 жылдың шілдесі мен 2025 жылдың маусымы аралығында бұл құрылғылардың сатылымы өткен жылмен салыстырғанда 77 пайызға өсті.
Yandex Qazaqstan — машиналық оқыту мен нейрожелілерге негізделген өнімдер мен сервистерді жасайтын технологиялық компания. Компания пайдаланушылардың өмір сапасын жақсартуға және Қазақстандағы цифрлық ортаны дамытуға бағытталған инновациялық технологияларды әзірлеумен және енгізумен айналысады. Қазіргі таңда елде іздеу, қалалық, бұлттық және ойын-сауық сервистері жұмыс істейді, сондай-ақ компания білім беру және әлеуметтік жобаларды дамытып жатыр.
Мәтіннен қате тапсаңыз, бізге жазыңыз
