Таразда су шаруашылығы саласында еңбек ететін мамандарға 51 бірлік техника берілді. «ҚазСуШар» мекемесінің қызметкерлеріне жаңа көліктердің кілтін Су ресурстары және ирригация министрі Нұржан Нұржігітов табыстады. Су шаруашылығы инфрақұрылымын жақсартуға арналған техникалар «Өнеркәсіпті дамыту қоры» арқылы алынған. Жаңартылған техника паркі аймақ алқаптарын суару маусымына уақытылы дайындығын қамтамасыз етеді. Бұл ретте ағын су арналарын механикалық тазартудан өткізу өнімді болмақ. Техникалық жаңғырту шаруаларға жетуі тиіс су көлемінің кестеден кешікпей жетуіне де сеп болады. Жалпы Президент тапсырмасына сай «Қазсушар» мекемесі қызмет сапасының жақсаруы жолға қойылып келеді. Республика бойынша да кәсіпорын филиалдарын жаңа техникамен жабдықтау жағы қарқынды. Бүгінге дейін барлық мекемеге 757 арнайы техника мен 400-ден аса көлік түрі жеткізілген.
Нұржан Нұржігітов, ҚР Су ресурстары және ирригация министрі:
Өзімізге міндет қойдық жылда айлықтарын көтереміз деп. Өздеріңіз білесіздер былтырғы жылы мамыр айынан бастап жалақыны 25 пайызға көтердік. Биыл 1 шілдеден бастап тағы да орта есеппен алғанда бүкіл Қазақстан бойынша осы мамандардың айлығын 50 пайызға көтердік.
Данияр Әлімқұл
