Қостанай облыстық ауруханасында науқас дәрігерге шабуыл жасап, ауыр жарақаттады. Хирург қазір жансақтау бөлімінде жатыр, деп хабарлайды Skifnews.kz ақпарат порталы.
Оқиға шамамен сағат 13:00-де дәрігердің қабылдау бөлмесінде болған. Кезегін ұзақ күткеніне ашуланған пациент кабинетке кіріп барып, операциядан жаңа келген хирургті соққының астына алған. Салдарынан дәрігердің басына ауыр жарақат түсіп, миға қан құйылуы және бас сүйек негізінің сынуы күдігімен жансақтау бөліміне жеткізілді.
Шабуылдың куәгері болған басқа науқастар мен дәрігердің әріптестері қатты шошып қалғандарын айтты. Ал оқиға орнына келген полицейлердің агрессорға қатаң шара қолдануға асықпағаны да видеожазбада анық көрінеді. Қазір облыстық денсаулық сақтау басқармасы ресми түсініктеме берген жоқ.
