Бүгінге дейін 360-тан аса талантты жас «Дарын» сыйлығының иегері атанды.
Олар халықаралық және республикалық конкурстардың, фестивальдар мен көрмелердің лауреаттары, республикалық және халықаралық деңгейдегі спорттық жарыстардың жүлдегерлері мен жеңімпаздары, сондай-ақ ғылыми қызметкерлер. Талантты жастарды қолдайтын жоба биыл да жалғасын табады. Қазір елде үміткерлердің құжаттарын қабылдау жүріп жатыр. Комиссия талапкерлерді екi кезеңде қарайды.
Қайрат Қамбаров, ҚР Мәдениет және ақпарат министрлігі Жастар және отбасы істері комитетінің төрағасы:
- Бірінші кезеңде жан-жақты қарау мақсатында Комиссия мүшелерінен «Эстрада, классикалық музыка, халық шығармашылығы», «Әдебиет, театр және кино», «Журналистика және қоғамдық қызмет», «Спорт», «Дизайн және бейнелеу өнері», «Ғылым» бағыттары бойынша 6 секция құрылады. Екiншi кезеңде Комиссия Секция отырысының шығарған нәтижесін негізге ала отырып, сыйлық беру туралы шешiм қабылдайды.
Сондай-ақ 2021 жылдан бері талантты жастарға Мемлекет басышысының бастамасымен "Тәуелсіздік ұрпақтары" гранты беріліп келеді. Грант конкурстық негізде «Ғылым», «Мәдениет», «Ақпараттық технологиялар», «Бизнес», «Медиа» және «Волонтерлік» бағыттары бойынша жобаларды іске асыруға арналған. Грантқа 14 жастан 35 жасқа дейінгі ел азаматтары үміткер бола алады.
Қайрат Қамбаров, ҚР Мәдениет және ақпарат министрлігі Жастар және отбасы істері комитетінің төрағасы:
- Биыл өтінімдерді қабылдау 16 маусымнан 18 тамызға дейін жүргізіледі. Конкурстың қорытындысы бойынша жыл соңына дейін 30 жас азаматқа 3 млн теңге мөлшерінде «Тәуелсіздік ұрпақтары» гранты беріледі. Грантты пайдалану мерзімі бір жылдан аспайды.
