Аралас жекпе-жектен әлем чемпионы, танымал спортшы Шавкат Рахмонов эксклюзивті сұхбат берді. Ол Ulysmedia-ға берген сұхбатында өзін «бұрынғыдай аш емес» деп сынайтындарға жауап берді, деп хабарлайды Skifnews.kz ақпарат порталы .
«Мен мүмкін, аш болмасам, мүлде спортты тастап кететін шығармын. Менің алдыма қойған мақсатым бар, сол үшін жүрмін. 24 сағат бойы жаттығу жасай беретін робот емеспін, денсаулығым бар. Орныма біреу келіп, мен жүрген жолмен жүріп көрсін, сол кезде біледі. Ал, аш емес деген әңгімелер түк те керек емес. Жалпы ондай әңгімелер білмегендіктен, надандықтан деп ойлаймын. Мен де шығып, Қазақстанға белбеуді әкелгім келеді. Құдай қаласа, денсаулығымыз шыдаса, әкелеміз. Жаттығу жасап жатқанымды көбісі көрмейді ғой. Бірақ сыртта жүрсем, көлікте жүргенімді көріп не істеп жүрсің дейді. Бірақ, бәрінің орны бар. Көбіне мен жаттығу жасап жатқанымды көрсетпеймін. Қазір күніне 1-1,5 сағаттан күніне екі рет жаттығу жасаймын», — дейді ол.
Спортшы кішкентай кезінен жарысқанды жаны сүйетінін де жасырмады.
«Әрдайым айтамын, мен байдың баласы болсам, өзімді қинап спортта жүрмейтін едім. Өзімнің жұмысым, бизнесіммен айналысатын едім. Спорт еңбекті талап етеді, денсаулығыңды, уақытыңды құртасың. Жастарға да айтарым, білім алып, оқып, адам болған дұрыс. Спортқа еріккеннен келген жоқпын. Кішкентай кезімнен жарысқанды жақсы көремін, жеңілгендщі жек көремін. Менің орнымда біреу болғанда осыншама жарақаттармен спортты тастап кететін еді. Белбеуді Қазақстанға әкелгім келеді. Алла нәсіп етсе, әкелеміз. Біз пендеміз, біз ешкімге уәде бере алмаймыз. Қолымнан келгенін жасаймын, нәтиже Алладан», — дейді ол.
