Мәжіліс депутаты Бақытжан Базарбек "СҚ-Фармация" ЖШС, Дәрілік заттарды сараптау ұлттық орталығы, Бірыңғай дистрибьютор және еліміздегі фармацевтикалық компаниялардың қызметіне қатысты Бас прокуратураға арыз түсірді, — деп хабарлайды Massaget.kz тілшісі.
Депутаттың сөзінше, бұған дейін берген уәдесінде тұрып, Жоғары аудиторлық палатаның аудит қорытындысында мемлекетке айтарлықтай залал келтірген заңбұзушылықтар анықталғаннан кейін Бас прокуратураға төрт өтініш жолдауды ұйғарған:
- "СҚ-Фармация" ЖШС мен фармацевтикалық индустрия субъектілерінің қызметіне қатысты;
- ӘМСҚ (МӘМС) және медициналық ұйымдарға қатысты;
- Ауыл шаруашылығы саласындағы субсидияларға қатысты;
- 2024 жылғы республикалық бюджеттің орындалуы жөніндегі Үкімет есебі бойынша бірқатар министрлікке қатысты.
"Кеше Бас прокуратураға "СҚ-Фармация" ЖШС мен фармацевтикалық сала субъектілеріне қатысты алғашқы өтінішім жолданды. Өтінішімді әріптесім Мұрат Әбенов қолдап, бірге қол қойды. Прокуратура органдары тарапынан фармацевтикалық салаға ауқымды тексеріс жүргізіледі, құқық қорғау органдары тарапынан соталды тергеулер, сондай-ақ, сот процестері болады, (кінәлілер — еск.) қамауға алынады деп күтеміз", — деді депутат.
Бұған дейін не белгілі?
Еске салайық, бұған дейін Мәжіліс депутаты Бақытжан Базарбек қылмыс белгілері барын айтып, "СҚ-Фармация" басшылары жай ғана жұмыстан босатылғанына күмән келтірді. Депутат арыз жазуға уәде беріп, оларды Антикор, ҚМА және Бас прокуратураға тапсыруды талап етті.
Қызықты жаңалықтар мен видеоларды көру үшін TikTok арнамызға жазылыңыз!
