Ұлттық домбыра күні Жетісу облысында рекорд орнатылды, деп хабарлайды 24KZ. Талдықорғанның орталық алаңына жиналған 5 мың адам әуеден қарағанда домбыра пішінін бейнеледі. Сөйтіп, бір мезетте «Бақтыбайдың әуенін» және «Еркесылқым» күйін шертті. Оған мектеп жасындағы жасөспірімдерден бастап егде жастағыларға дейін атсалысты. Көпшілік шахарды күмбірлеген күйге бөлеп, сан ғасырдың үнін жеткізген ұлттық аспапты ұлықтады.
Айтулы шараға Қазақстан рекордтар кітабының ресми өкілі де қатысты. Ол жаңа рекорд тіркелгенін растап, облыстық Мәдениет басқармасының басшысына арнайы сертификатты табыстады. Игі бастаманы қарағандылықтардан қабыл алған Жетісу жұртшылығы оны Атырау өңіріне төл аспаптың үнімен жолдады.
Нұрсұлтан Қанатбек, оқушы:
- Күйді жаттағынды және ойнағанды жақсы көремін. Өзімнің жүрегіме жақын зат. Жалпы алғанда әр күйдің тарихы бар. Ол біздің қазақ тарихымен астасып жатыр.
Бақытжан Тастүлеков, Қазақстан рекордтар кітабының ресми өкілі:
- Ең алғашқы рет 1037 адамды жинаған болатын. Одан кейін Оралда 1700 адам болған. Одан кейін Түркістанда, Рудныйда, Астанада 3 мың адам жиналып, күй орындаған жағдай болған. Ал бүгін Талдықорғанда 5 мың адам жиналып отыр. Сондықтан бұны біз Қазақстанның рекорды деп есептейміз. Тіркейміз. Кітаптың келесі шығарылымына енеді.
