Алматы қаласының Қытайдағы туризм күндері туристік және мәдени саладағы іскерлік байланысты нығайтуға бағытталды, деп хабарлайды 24KZ. Оған 100-ден астам компания қатысты. Іс-шара кезінде екі елдің туроператорлары арасында B2B кездесу ұйымдастырылып, бірқатар келісімге қол жеткізілді.
Ислам Іскербеков, қазақстандық компанияның өкілі:
- Біздің компания жолаушылар тасымалымен айналысады. Қазақстан мен Қытай арасында барыс-келіс күннен күнге артып келеді. Бұл алаң бізге өте маңызды. Мұнда біз ақпараттармен алмасып, тығыз байланыс орнатуға мүмкіндік алып отырмыз. Кездесудің арқасында жолаушылар көлемін анықтап, болжай аламыз.
Қытай заңнамасына сәйкес лицензия шағын ұйымдарға берілмейді. Саяхатшыларды ірі компаниялар ғана жібере алады. Іс-шара аясында қазақстандық туроператорлар олармен келісім жасап, Қытайдың 25 провициясының нарығына жол ашылды.
Жансерік Бақытжанұлы, туристік компания жетекшісі:
- 50 группа айына жіберіп жатса, ол дегеніңіз шамамен 5-6 мың адам. Осы компаниямен қол қойып, әлі де жұмыс істей берсек, туризм саласында үлкен өзгерістер, үлкен серпіліс болады деп ойлаймын.
Екі ел арасындағы туризм визасыз режим орнаған күннен бастап қарқынды дами бастады. Қазақстанның туристік және инфрақұрылымдық әлеуеті Орталық Азиядан бөлек, Таяу Шығыс елдеріне, сондай-ақ Кавказ, Еуропаға шығуға мүмкіндік беріп отыр. Кейінгі екі жылға жуық уақыт ішінде Алматыға саяхаттайтын қытайлықтар саны артқан.
Мақпал Әбдіқадыр, Алматы қаласы Туризм басқармасының бөлім басшысы:
- Қазіргі таңда Алматы қаласына келетін туристер санының 14,4%-ін Қытайдан келетін туристер алады. Алматы қаласынан 7 компания қатысып отыр. Көрікті жерлер бойынша ақпараттар көрсетіледі. Туроператорлар өздерінің презентациясын жасайды.
Айта кету керек, Алматы қаласының туризм күндері барысында еліміздің қолөнері, зергерлік бұйымдар, ұлттық тағамдар таныстырылды. Суретшілер өз өнерін көрсетіп көрме ұйымдастырылды. Ал өнерпаздар ұлттық аспаптарда ойнап, қазақ әндерінен шашу шашты.
Авторлары: Руслан Бақытбекұлы, Мадияр Ерсайын
