Шымкентте мемлекеттік қызметшілер үшін уақытша ұстау изоляторына экскурсия ұйымдастырылды.

Мұндағы мақсат – олардың бойында сыбайлас жемқорлыққа қарсы мәдениетті қалыптастыру. Профилактикалық шаралардың тиімді құралы ретінде мемлекеттік қызметшілерге қылмыс жасаған адамдардың ұсталу шарттары таныстырылды.

Мемлекеттік қызметшілерге бір сәтке болса да тергеу изоляторындағы өмірді өн бойынан өткізуге тура келді. Оларға қатаң режимді жабық мекеменің міндеттері ескертіліп, «Заң мен тәртіп» қағидалары түсіндірілді. Күдіктілердің не себепті қамауға алынғаны айтылды.

Сардар Борашов, ҚАЖ департаменті №69 тергеу изоляторы бастығының орынбасары:

- Қазіргі таңда тергеу изоляторында 800-ден астам тергеудегі сотталушы азаматтар мен азаматшалар отыр. Оның ішінде процентке шаққанда 70% ер адамдар, 30% әйел азаматшалары жатыр. Бізде уақытша тергеу амалдары біткенше жатады осында. Ұсталады.

Олардың дені бюджет қаражатын жымқыру, алаяқтық пен синтетикалық заттарды тасымалдау бабы бойынша айыпталған. Экскурсияға қатысушылар олардың күн тәртібімен танысып, карантин бөлімшесі мен арнайы камераларды аралады.

Барат Ахметов, қалалық жер қатынастары басқармасының бөлім басшысы:

- Басты бұл жерден түйгеніміз бостандықты бағалау керек. Бәріміздің үйімізде бала-шағамыз күтіп отыр. Соны бағалауымыз керек. Қылмысқа бармауымыз керек. Тек қана пара емес. Басқа да қылмысты жасамау керек деген ойларды түйдік.

Биыл пара беру, қазына қаржысын жымқыру бойынша 30 дерек тіркелді. Сыбайлас жемқорлыққа қарсы күрес департаментінің мамандары парақорлықтың алдын алу мақсатында бұған дейін тергеу изоляторына аудан әкімдері мен мектеп директорларын, квазимемлекеттік сектор өкілдеріне экскурсия өткізген.

Нұртөре Қалдыбаев, сыбайлас жемқорлыққа қарсы іс-қимыл департаменті басқарма басшысының орынбасары:

- Қазіргі таңда осы сыбайлас жемқорлық құқық бұзушылықтары жыл сайын азаюда. 2023-2024 жылдарға қарағанда 2% төмендеді. Мынандай профилактикалық іс-шаралар өз маңыздылығын көрсетуде.

Заң алдындағы жауапкершілік жалпыға ортақ. Алдағы уақытта қылмысты болдырмауға бағытталған экскурсия сот залында жалғаспақ. Жоспар бойынша мемлекеттік қызметшілер үкім оқу сәтіне қатысып, жаза алған әріптесінің жауапкершілікке тартылғанына куә болады.

Нұрсұлтан Мұхамеджан, Нұрмахан Бекмұратов