Әлем цифрлық дәуірге қадам басты. Мемлекеттік қызметтің барлық түрі сандық форматқа ауысып жатыр, деп хабарлайды 24kz.
Жекелеген сектор да осындай игілікке бет бұрған. Жоғары технология мүмкіндіктерін көмекші құрал ғана емес, қозғаушы күш ретінде қарастыратын елдің бірі – Араб әмірліктері. Шығанақтағы мемлекет нарықты жасанды зерде жүйелерімен толықтай қамтуға кіріскен. «Мақсат – «AI» өнімдерін үкіметтік басқару моделіне енгізіп, түрлі сатыдағы шешім қабылдау процесін автоматтандыру», — дейді мамандар.
Рауан Мыңбай, тілші:
- Араб әмірліктері жаһандық жоғары технология кеңістігіне жан-жақты танылған нарық. Цифрлық үкімет, жасанды зерде және инновация сынды бағыттарда айқын көшбасшы. Әйгілі «Big Tech» компаниялар мұнда өкілдік ашып, шаруасын ширатқан. Соның әсерінен мемлекеттік басқару моделі digital жобаларға жаппай негізделіп келеді. Электронды үкіметтің енгізілуі 1400-ден астам қызметті онлайн форматқа көшіріп, уақыт пен қаржыны көп үнемдеуге сеп болған.
Нәтижесінде әмірлік цифрландыру бойынша ғаламдық рейтингте былтыр алғашқы ондықтан көрінді. Ал Қазақстан 193 ел ішінде 24-ші сатыға жайғасты. Бұл ТМД кеңістігіндегі ең жоғары көрсеткіш.
Тарик Ахмед Низами, сарапшы, бизнес қауымдастық төрағасы:
- Цифрландырудың айрықша үлгісін жергілікті әуежайлардан көре аласыз. Ол жерлерде ең үлкен цифрлық платформа іске қосылған. Тек электронды құрылғылар қызмет көрсетеді. Әмірліктің департаменттері де осы қағидаға сүйеніп, жүйелі жұмысты жолға қойды.
Электронды жабдықтар жеке секторда көрсетілетін мемлекеттік қызмет сапасын жақсартып қана қоймай, қоғамдық орында ұзын-сонар кезек мәселесін шешті. Шығанақ жерінде оң өзгерісті аңғару қиын емес. Жылына миллиондап мейман қабылдайтын елдің шекаралық өткізу бекеттерінде бүгінде еш қарбалас жоқ. Келешекте бұл істі қашықтан басқаратын мамандар да болмауы мүмкін. Себебі үкімет «AI» мүмкіндігін жан-жақты сынауға кірісті. 2027 жылы Абу Дабиде деректер негізінде шешім қабылдайтын цифрлық мемлекет құру идеясы іске аспақ.
Ахмад Ибниан, жеке сектор қызметкері:
- Араб әмірліктерінде тұрғын үй сату-сатып алу шарты, сенімхат жасау және төлқұжатты қайта басып шығару сынды қызметтер 2-3 күнде онлайн іске асатын болды. Тараптар бір-бірімен кездеспей-ақ шаруасын реттей береді. Тіпті өтінім беруші жергілікті тұрғын емес, шетел азаматы болса да қолайлы жағдай жасалады.
Жалпы Әмірліктер мемлекеттік және жеке секторды цифрландыруды 10 жыл бұрын қолға алды. Тақауда ғана «AI» министрлігі құрылды. Ол қалалар мен елдімекендерді «smart city» тұжырымдамасына сай түрлендіріп, қауіпсіздік пен тәртіпті қатаң қадағалайды. Жергілікті компаниялар АҚШ-тан жасанды зерде өнімін ғана емес, тұтас технологиясын экспорттай бастады. Мақсат — «AI» өнімдерін араб жерінде әзірлеп, кейін сыртқа саудалау.
Тарик Ахмед Низами, сарапшы, бизнес қауымдастық төрағасы:
- Келешекте біздің елге тағы көптеген жоғары технология келеді деген ойдамын. Билік тарапынан жасанды зердені қолдану және оны басты көмекші құралға айналдыру ісі басталып кетті. Ол тек мемлекеттік емес, жеке секторға да енгізіліп жатыр. Бастысы, мұндай игілікті резиденттер де толықтай сезіне алады.
Тағы бір ерекшелік, араб мемлекетінде баланы балабақшаға тіркеу 3 минут ішінде іске асады. Бизнеске қандай да бір рұқсат қағазын алу уақыты да қас-қағым сәт. Тек тиісті төлемін жасаса болғаны. Мұндай онлайн сервис халыққа да, үкіметке де өте тиімді.
Айта кетейік, арнайы жүргізілген сауалнама бойынша әмірлік тұрғындарының 91%-- цифрлық қызмет сапасына қанағаттанарлық баға берген.
Авторы: Рауан Мыңбай
