Мемлекет басшысы бұқаралық ақпарат құралдары саласы қызметкерлерін марапаттады.
Ұлттық медиа – халықтың үні, ал журналист жасампаздық жаршысы екенін атап өтті. Бүгін марапат алып, мерейі үстем болғандар қатарында Хабар агенттігінің де мамандары бар. Медаль тақты, алғыс алды.
Әділетті Қазақстанды кемеңгер көсемдер емес адал азаматтар құрады. Істің адамдары ақиқатқа айналдырады. Соның алдыңғы сапында қалам ұстаған қауым тұр. Президент журналистерді кәсіби мерекемен құттықтап, абыройлы міндетін де атап өтті.
Қасым-Жомарт Тоқаев, Қазақстан Республикасының Президенті:
- Сіздер мемлекет саясатын елге түсіндіріп, қоғам мен биліктің арасында көпір болып келесіздер. Елімізде жасалып жатқан реформалардың мән-мағынасын жұртшылыққа жеткізіп жүрсіздер. Бұл өте маңызды, күрделі, ерекше жұмыс. Әрбір адамның қолынан келмейді. Мен бүгін бәріңізге шынайы ризашылығымды білдіремін.
Ортада саланың сүрлеуін сара жолға айналдырған ардагерлер де отырды. Президент олардың атын атап, түсін түстеді. Себебі Сауық Жақанова, Жарылқап Бейсенбайұлы, Шархан Қазығұл сияқты майталмандар журналистиканы дамытуға сүбелі үлес қосты.
Қасым-Жомарт Тоқаев, Қазақстан Республикасының Президенті:
- Қазіргі ақпарат тасқынында сенімді дерек, дәйекті талдау ұсынудың мән-мағынасы арта түсті. Журналистің ағартушылық миссиясы алдыңғы қатарға шықты. Кез келген ақпаратты мұқият елеп-екшеп, жұртқа дұрыс жол көрсету өте маңызды. Бұл ретте, сіздерді ақпарат әлемінің темірқазығы деуге болады. Мен журналистеріміздің әр мәліметті ұлт мүддесі тұрғысынан саралай аларына сенемін. Өйткені өзім көп оқимын, сіздер жазған мақалалармен, ой-пікірлермен таныспын.
Қасым-Жомарт Тоқаев сол таныс мамандарға өз атынан марапат табыстады. Жылда берілетін сыйлығы және гранты бар. Хабар агенттігі қызметкерлері «Ерен еңбегі» мен «Шапағат» медалін тақты. Ал ұжымға алғыс жарияланды.
Талғат Батырхан, «Egemen Qazaqstan» газеті бас редакторының орынбасары:
- Әр заман өз талабымен келеді. Қазір жасанды интеллекті кеңінен таралып жатыр. Тіпті, сарапшылар келешекте адам еңбегін алгоритмдер алмастыратынын айтады. Дегенмен, ол журналистиканың екінші тынысын ашуы мүмкін,-деді Президент.
Қасым-Жомарт Тоқаев, Қазақстан Республикасының Президенті:
- Біз озық ойлы ұлт болуымыз қажет. Көш бастайтын елдердің қатарына қосылуымыз керек. Бір ел болып, жұдырықтай жұмылсақ, бұл мақсатымызға міндетті түрде жетеміз. Осы ортақ жұмысқа журналистер қауымы да зор үлес қосып жүр. Сіздерді реформаның қозғаушы күші деп айтуға болады. Түптеп келгенде, билік те, баспасөз де ел игілігіне қызмет етеді. Еліміздің мақсаты – биік, бағдары – айқын. Бұл Әділетті, Қауіпсіз, Өркениетті және Таза Қазақстанды құру.
Міржақып Дулатов «қай жұрттың баспасөзі күшті болса, сол жұрттың өзі де күшті» деген. Сондықтан қазіргідей алмағайып әрі бұлыңғыр заманда ең алдымен бірлік керек. Тұрақтылық пен тыныштық – басты байлығымыз.
Нысаналы Ығыл
