Ақтөбе өңірінде «Келешек мектептері» ұлттық жобасы аясында 11 мыңнан аса бала білім алады. Қазірдің өзінде облыс орталығында екі мектеп пайдалануға берілді. Тағы 12 білім ордасы салынып жатыр.
Бұл «Есет батыр» шағын ауданындағы 2 мың балаға шақталған мектеп. Мұнда 55 оқу кабинеті бар. Технология, инженерия және математика пәндері тереңдетіліп оқытылады. Ақжар-2 елді мекенінен 2 жарым ай бұрын ғана ашылған білім ордасы да заманауи құрал-жабдықтармен толық қамтылған. Соңғы оқу жылының төртінші тоқсанын 440 бала аяқтады. Қазір жазғы лагерь жұмыс істеп тұр. Өңірде 9 100 орындық тағы 12 мектеп ашылады. Олар Ақтөбе қаласында және Темір, Мұғалжар, Мәртөк аудандарында бой көтеріп жатыр.
Динара Асан, №79 жалпы білім беретін орта мектеп директорының міндетін атқарушы:
Оқушы үшін барлық жағдай жасалынған. Мектепте робототехника, стем кабинеті, информатика кабинеті, ер балаларға, қыз балаларға арналған шеберхана, акт залы, спорт зал, 90 оқушыға арналған асхана барлығы да материалдық-техникалық базасы жоғары деңгейдегі заманауи техникамен қамтылған.
Жақсыбек Кемал
