Президент Архиві Әбіш Кекілбайұлының мол мұрасын, оның ішінде әдеби шығармалары мен саяси қызметіне қатысты құжаттарын, жеке жазбалары мен қолжазбаларын ресми түрде мемлекеттік сақтауға қабылдады, деп хабарлайды 24KZ. Бұл екі жылдан астам уақытта жүргізілген ауқымды жұмыстың және зор ізденістің нәтижесі.
Жинақ 22 мыңнан астам парақтан тұрады. Ішінде автордың хаттары, Парламент пен Үкіметте жасаған баяндамалары қамтылған. Жазушының ұрпақтары бұл баға жетпес рухани қазынаны көздің қарашығындай сақтап, ел игілігіне айналдыру үшін үлкен жауапкершілікпен жүйелі жұмыс жүргізді. «Құжаттарды тапсыру туралы шешім – тек отбасылық емес, ұлттық деңгейдегі тарихи шешім», – дейді зиялы қауым өкілдері.
Абыл Кекілбаев, Әбіш Кекілбаевтың немересі:
- 20 шақты кітаптар, аудармалар, атамыздың шығармашылығын аударған басқа да аудармашылардың қолжазбалары, оған қоса ресми Қазақстан тәуелсіздік алған кезде сөйлеген ресми сөздері, БАҚ-та басылған мақалалары, тәуелсіздігіміздің ең басында жазылған сөздерінің бәрінің түпнұсқалары сақтаулы. Келешекте әбіштанушы мамандарға қызықты болады деп сенемін.
